Şəhidlərin xatirəsi Məşədi Dadaş Məscidində anıldı - FOTO
Bu gün paytaxtın Nəsimi rayonunda yerləşən Məşədi Dadaş Məscidində Vətən müharibəsində şəhid olanların xatirəsinə həsr edilmiş anım mərasimi keçirilib.
Rakus.az xəbər verir ki, “Report”un məlumatına görə, mərasimdə canlarını Azərbaycan Respublikasının ərazi bütövlüyü uğrunda qurban vermiş Vətən müharibəsi şəhidlərinin əziz xatirəsi bir dəqiqəlik sükutla yad edilib.
Daha sonra Vətən uğrunda canından keçmiş şəhidlərimizin ruhuna hədiyyə olaraq, namaz qılınıb, dualar oxunub və Quran tilavət edilib.
Məscidin axundu, ilahiyyatçı Hacı Şahin Həsənli çıxış edərək Vətən müharibəsində Azərbaycan Əsgərinin nümayiş etdirdiyi şücaətdən danışıb və İslam dinində şəhidlərə verilən dəyərdən söz açıb. O, şəhidlik zirvəsinin mahiyyətindən bəhs edib.
İlahiyyatçı qeyd edib ki, Azərbaycan xalqının birliyi və Azərbaycan Ordusunun gücü nəticəsində Ali Baş Komandanın rəhbərliyi altında işğal altında olan torpaqlar azad edilib.
Qeyd edək ki, Vətən müharibəsində Silahlı Qüvvələrimizin 2 783 nəfər hərbi qulluqçusu həlak olub. Onların sırasında 103 nəfər hərbi qulluqçunun DNT analiz metodu ilə şəxsiyyətinin müəyyən edilməsi üzrə işlər davam etdirilir. 100 nəfərdən artıq hərbi qulluqçumuz isə itkin düşmüş hesab olunur. Onların tapılıb ailələrinə məlumat verilməsi üçün zəruri tədbirlər görülür. Hazırda 1 245 nəfər hərbi qulluqçumuzun tibb müəssisələrində müalicəsi davam edir.
Allah bütün şəhidlərimizə rəhmət eləsin və yaralı hərbçilərimizə şəfa versin!
