Qərbi Azərbaycana qayıdış APA-nın Bakı Bəyannəməsində qeyd edilib - FOTO

“Bu il fevralın 19-20-də spiker Sahibə Qafarovanın rəhbərliyi, Milli Məclisin təşkilatçılığı ilə Bakıda yüksək səviyyədə keçirilən Asiya Parlament Assambleyasının toplantısında önəmli qərarlar qəbul olunub. Sessiyanın Bakı Bəyannaməsində Qərbi Azərbaycandan olan soydaşlarımızın öz yurdlarına ləyaqətli qayıdışının həyata keçirilməsi ilə bağlı müddəaların əlavə olunması da çox vacib məqamdır. Bu, həm də Qərbi Azərbaycan həqiqətlərinin beynəlxalq miqyasda yayılması və qəbul olunması istiqamətində növbəti əhəmiyyətli addımdır”.

Rakus.az xəbər verir ki, bunu Asiya Parlament Assambleyasının toplantısında iştirak edən deputat, Milli Məclisin Asiya Parlament Assambleyasında (APA) nümayəndə heyətinin rəhbəri Rizvan Nəbiyev parlamentdə keçirilən toplantının önəmli məqamları, həmçinin Qərbi Azərbaycan mövzusunun Bakı Bəyannaməsində əksini tapması ilə bağlı keçirdiyi brifinqdə deyib.

Onun sözlərinə görə, Asiya Parlament Assambleyasının platformasından istifadə edərək etnik təmizləməyə məruz qalaraq zorla Ermənistandakı öz tarixi torpaqlarından qovulan təxminən 300 min azərbaycanlı qaçqın barədə məsələni qaldırdıq: “İndiyə qədər APA-nın müxtəlif komitə iclaslarında, İcraedici Şura və Plenar sessiyada səsləndirdiyimiz bu vacib məsələ APA-nın 20 fevral 2025-ci ildə qəbul etdiyi Bakı Bəyannaməsində əksini tapdı”.

O jurnalistlərə açıqlamasında bildirib ki, Asiya Parlament Assambleyası Ermənistandan qovulmuş azərbaycanlıların ata-baba yurdlarına qayıtmalarının təmin olunması məqsədilə səylərin səfərbər edilməsi üçün çağırış etdi: “Bu, Milli Məclisin, onun rəhbərliyinin uğuru hesab edilə bilər. Çünki Ermənistandakı tarixi yaşayış məskənlərinə geri qayıdış Azərbaycan Prezidentinin prinsipial mövqeyinin mühüm tərkib hissəsidir. Bakı Bəyannaməsində qeyd edilib ki, biz-Asiya Parlament Assambleyasında təmsil olunan parlamentlərin üzvləri, Qərbi Azərbaycan İcmasının, beynəlxalq insan hüquqlarına dair müxtəlif sənədlərdə təsbit edildiyi kimi, Ermənistandakı öz əcdadlarının evlərinə qayıdışı üçün dialoqa başlamaqla bağlı dəfələrlə etdikləri müraciətləri qəbul edir və bu qovulmuş azərbaycanlıların təhlükəsiz və ləyaqətli şəkildə qayıdışının təmini üçün bütün səyləri səfərbər edirik”.

Xatırladaq ki, bu il fevralın 19-20-də Milli Məclisin inzibati binasında Asiya Parlament Assambleyasının (APA) “Asiyada çoxtərəfli əməkdaşlığın gücləndirilməsində parlament diplomatiyasının rolu”  mövzusuna həsr edilmiş 15-ci plenar sessiyasının açılış mərasimi keçirilib. Tədbirdə 35 nümayəndə heyəti, o cümlədən, ümumilikdə 280 nəfərə yaxın nümayəndə iştirak edib. Prosedur qaydalarına görə, sənəd APA tərəfindən bu gün yayımlanıb.