“Sovet imperiya siyasəti Azərbaycan və Ermənistan arasında münaqişəyə səbəb oldu”
Bu gün Baku TV-də Qərbi Azərbaycan Xronikası layihəsi çərçivəsində rus dilində növbəti buraxılış hazırlanıb.
Rakus.az xəbər verir ki, aparıcı Ellada Sarvanın qonağı tarix üzrə fəlsəfə doktoru, Bakı Ali Neft Məktəbinin dosenti, AMEA-nın A.A.Bakıxanov adına Tarix və Etnologiya İnstitutunun aparıcı elmi işçisi Pərvin Əhənçi olub.
O, Avropa ölkələrində keçirilən bir sıra əhəmiyyətli beynəlxalq konfrans və seminarlarda iştirak etdiyini, Rusiya imperiyasının müstəmləkə siyasəti, Sovet İttifaqının ideoloji hekayələri və Cənubi Qafqazda postsovet yaddaş siyasətindən danışıb: “Krakov, Saloniki və Litva konfransındakı məruzələr maraqla qarşılandı. Avropa akademik auditoriyasının bu imperiya prosesləri daxilində Azərbaycandan köçkünlük və tarixi ədalət mövzusunda fikirlərini eşitməsi vacib oldu. Bu platformalar həqiqətlərin təbliği baxımından mühüm rol oynayır. Avropa bizə yaxındır, lakin ictimaiyyəti bizim haqqımızda az şey bilir”.
Onun sözlərinə görə, bir ölkə haqqında mənbədən məlumat əldə etmək vacibdir: “Ermənistandan məcburi köçürülmə problemi var. Çarizm dövründə Azərbaycan imperiyanın periferiyası hesab olunurdu. Sovet dövründə “dostluq”, “birlik” və “bərabərlik” kağız üzərində qalırdı. Azərbaycan Cənubi Qafqazda aparıcı oyunçudur. İmperiya siyasəti bəzi xalqların hüquqlarını pozur, digərlərinin hüquqlarını isə yüksəldir. Xalqları deportasiya etməklə onların tarixi yaddaşı silinib. SSRİ-də muzeylər ideoloji zorakılıq mənbəyi idi. Bu gün onlar yaddaş məkanıdır. Azərbaycan əsl tarixi məhv etmir, əksinə yenidən yaşadır. Azərbaycan, Ermənistan və Gürcüstan sovetləşmədən imtina siyasəti yürüdür. Sovet imperiya siyasəti Azərbaycan və Ermənistan arasında münaqişəyə səbəb oldu”.
P.Əhənçi ABŞ-dakeçiriləcək tədbirə qatılacağını vurğulayıb və deyib ki, Qərbi azərbaycanlıların qayıdışı məsələsi beynəlxalq səviyyədə Vaşinqtonda qaldırılacaq.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Müsahibə noyabrın 11-də saat 18:30-da Youtube kanalında rus dilində yayımlanıb.
xxx
