YENİLƏNDİ: Türkiyə voleybolda, Rusiya basketbolda 3-cü oldu - FOTO
XV Avropa Gənclər Yay Olimpiya Festivalının basketbol yarışlarında üçüncü yer uğrunda görüşdə Rusiya və Çexiya komandaları qarşılaşıblar.
Rakus.az xəbər verir ki, “Sərhədçi” İdman Olimpiya Mərkəzində keçirilən oyunda Rusiya seçməsi 53:43 hesabı ilə qalib gələrək bürünc medala sahib olub.
Qızların yarışında 7-8-ci yerlər uğrunda Avropa Azərbaycan Məktəbində keçirilən digər qarşılaşmada Polşa yığması Türkiyə yığmasına 71:65 hesabı ilə qələbə qazanıb.
Hazırda qızların yarışında çempion adı uğrunda Macarıstan və Fransa, oğlanların mübarizəsində isə 7-8-ci yerlər uğrunda Azərbaycan və Xorvatiya komandaları qarşılaşırlar.
“EYOF Bakı 2019”un basketbol yarışları “Sərhədçi” İdman Olimpiya Mərkəzində və Avropa Azərbaycan Məktəbində keçirilir.
11:30
Türkiyənin voleybolçu qızları XV Avropa Gənclər Olimpiya Festivalının bürünc medallarına sahib olublar.
Rakus.az xəbər verir ki, Türkiyə yığması festivalın sonuncu günündə üçüncü yer uğrunda görüşdə İtaliya milli komandası isə üz-üzə gəlib. Fövqəladə Hallar Nazirliyinin İdman-Sağlamlıq Mərkəzində keçirilən qarşılaşmada türkiyəli voleybolçular 3:0 (25:23, 25:21, 25:23) hesabı ilə qələbə qazanaraq fəxri kürsünün üçüncü pilləsində yer alıblar.
Oyunu azərbaycanlı hakim Zaur Hacıyev idarə edib.
Bu görüşlə eyni vaxtda 7-8-ci yerlər uğrunda Azərbaycan Voleybol Mərkəzində keçirilən digər qarşılaşmada Ukraynanın voleybolçu qızları Bolqarıstan seçməsini məğlubiyyətə uğradıblar – 3:0 (25:18, 25:23, 25:21).
