SOCAR Ukraynada daha 3 yanacaqdoldurma kompleksi açır
SOCAR şirkəti 2020-ci ildə Ukraynanın Kiyev, Xarkov və Dnepr şəhərlərində yeni yanacaqdoldurma komplekslərini açacaq.
Rakus.az xəbər verir ki, bu barədə SOCAR-ın Ukraynadakı törəmə şirkəti olan “SOCAR Energy Ukraine”dən məlumat verilib.
Bildirilib ki, indi Kiyev və Xarkov şəhərlərində yeni yanacaqdoldurma kompleksləri üçün tikinti işlərinə başlanılıb. Yanvarın sonlarından isə Dneprdə tikinti işlərinə start veriləcək.
Yeni komplekslərin üstün cəhəti onların xüsusi dizaynla müasir sənaye üslubunda tikilməsidir. Burada hər şey SOCAR-ın ənənəsinə uyğun olaraq beton, şüşə və metal konstruksiyaların vəhdətindən ibarətdir.
Hazırda SOCAR-ın Ukrayna şəbəkəsində 60 yanacaqdoldurma məntəqəsi fəaliyyət göstərir ki, bunun 13-ü də Kiyev vilayəti ərazisinə düşür.
Xatırladaq ki, “SOCAR Energy Ukraine” Azərbaycan Dövlət Neft Şirkətinin törəmə şirkətidir. SOCAR-ın Ukraynadakı nümayəndəliyi 2008-ci ildə açılıb. Hazırda premium-klass yanacaqdoldurma məntəqələri şəbəkəsinə 60 kompleks, 2 yağ bunkerçisi daxildir. Onlar Ukraynanın 11 vilayətində fəaliyyət göstərir.
