OPEC təcili toplantıya hazırlaşır
Neft İxrac Edən Ölkələr Təşkilatı (OPEC) təcili toplantı keçirməyi nəzərdən keçirir.
Rakus.az xəbər verir ki, OPEC və tərəfdaşları neftin qiymətinin kəskin ucuzlaşmasına necə cavab verəcəklərini düşünür.
Rusiya Səudiyyə Ərəbistanının fövqəladə iclas təklifinə açıq olduğunu bildirib. Rusiyanın Energetika Aleksandr Novak deyib: “Prinsipcə, bu məsələlərə reaksiya verməyə hazırıq. Lakin vəziyyət daha dəqiq qiymətləndirilməli və yaxın günlərdə proseslərin necə inkişaf edəcəyini izləməliyik”.
OPEC-in nümayəndəsi isə qeyd edib ki, əvvəl martın 5-6-da keçirilməsi planlaşdırılan iclasın fevralın 8-9-da və ya 14-15-də təşkili müzakirə edilir. Bildirilir ki, OPEC-in Birgə Texniki Komitəsi koronavirusun bazara təsirini qiymətləndirmək üçün bu həftə toplaşacaq.
Daha əvvəl isə Əlcəzairin Energetika naziri Mohamed Arkab deyib: “Ehtimal ki, OPEC martda keçirəcəyi iclası daha tez – fevralda təşkil edəcək. Bununla bağlı yaxın günlərdə qərar verilə bilər”.
Əlcəzair OPEC-ə sədrlik edir, bu, ona baş katib və digər üzvlərlə məsləhətləşdikdən sonra təcili iclas keçirmək hüququ verir.
OPEC-in baş katibi Məhəmməd Barkindo daha əvvəl martda Avstriyanın paytaxtı Vyanada Neft İxrac Edən Ölkələr Təşkilatının iclasının keçiriləcəyini deyib. O, beynəlxalq ticarətdəki bəzi mübahisələrin həll olunacağını gözlədiklərini, eləcə də cari ilin birinci və ikinci rübündə sabitliyə diqqəti yönəltməkdə davam edəcəklərini bildirib.
Xatırladaq ki, 2019-cu il dekabrın 6-da OPEC və qeyri-OPEC Nazirlərinin VII Görüşündə “OPEC plus” üzrə gündəlik neft hasilatının daha 500 min barrel azaldılması barədə qərar qəbul edilib. Yeni “Əməkdaşlıq Bəyannaməsi”nə uyğun olaraq, Azərbaycanın öhdəliyi 27 min barrel müəyyən edilib. 2020-ci ilin yanvar ayından etibarən Azərbaycan gündəlik neft hasilatını 769 min barrel həcmində saxlamalıdır.
