İdlibdə atəş dayandırılır – Rusiya və Türkiyə razılaşdılar – TƏHLİL - FOTO
Rusiya və Türkiyə prezidentləri Suriyada münaqişənin nizama salınmasına dair memorandum imzalayıblar.
Rakus.az xəbər verir ki, martın 5-də Moskvada keçirilən danışıqların yekununa dair iki ölkə arasında imzalanmış memorandumu Rusiya və Türkiyə Xarici İşlər nazirləri Sergey Lavrov və Mövlud Çavuşoğlu oxuyublar. Sənəddə martın 6-na keçən gecə saat 1-dən etibarən İdlibdə atəşin dayandırılması, Suriyada M4 yolundan 6 kilometr Şimala və Cənuba doğru təhlükəsizlik dəhlizinin yaradılması, martın 15-dən etibarən M4 yolu boyunca Türkiyə və Rusiya hərbçilərinin birgə patrul həyata keçirməsi barədə bəndlər əksini tapıb.
Bundan əlavə, tərəflər Suriyanın ərazi suverenliyini dəstəklədiklərini və terrorizmlə mübarizə aparacaqlarını təsdiq ediblər.
Türkiyə Suriya hökumət qüvvələrinin hərəkətlərinə cavab vermək hüququnu özündə saxlayıb.
“Türkiyə Prezidenti ilə danışıqlar asan keçməsə də, pozitiv başa çatdı”.
Bu sözləri Rusiya Prezidenti Vladimir Putin Rusiya və Türkiyə prezidentlərinin Moskvada 6 saatdan çox davam edən görüşündən sonra keçirilən birgə mətbuat konfransında bildirib.
O deyib ki, iki ölkə İdlibdə gərginliyin aradan qaldırılmasına dair qərar qəbul edib və Suriya münaqişəsinin həllinə dair ümumi sənəd imzalayıb.
Putin çıxışında türkiyəli həmkarına təşəkkür edərək, Suriyada baş verən proseslərin həssas xarakter daşıdığını bildirib. O, İdlibdə baş verən hadisələr zamanı türk əsgərlərinin şəhid olmasına görə başsağlığı verib, Soçi anlaşmasının əhəmiyyətinə diqqət çəkib.
V.Putin əməkdaşlığın bundan sonra da davam etdiriləcəyini söyləyib: “Rusiya və Türkiyə Suriya probleminin nizamlanması üçün birgə sənədi razılaşdırıb. Rusiya və Türkiyə Astana razılaşmasını və terrorçularla mübarizəni davam etdirməlidir”.
Türkiyə Prezidenti R.T.Ərdoğan isə çıxışında deyib ki, 6 saatlıq görüş zamanı Suriya məsələsini ətraflı şəkildə müzakirə etdiklərini, görüşün müsbət keçdiyini vurğulayıb. O, İdliblə bağlı atılan addımların bölgədəki problemin həllinə yardımçı olcağına ümid bəslədiyini, bu gecədən etibarən atəşkəsin qüvvəyə minəcəyini və bunun davamlı olması üçün hər iki tərəf əlindən gələni edəcəklərini diqqətə çatdırıb: “Qaçqınlara yardım göstərilməsi üçün birlikdə çalışacaq, onların geri qaytarılmasına yardım göstərəcəyik”.
Onun sözlərinə görə, Türkiyə bu müddətdə rejimin törədə biləcəyi təxribata qarşı bütün tədbirlər görüləcək və Türkiyə bu haqqı özündə saxlayır.
R.T.Ərdoğan Cenevrə görüşündə əldə olunan razılaşmaya sadiq qaldığını, problemin həllinin yalnız sülh olduğunu bir daha vurğulayıb.
Sonra Rusiyanın Xarici İşlər naziri Sergey Lavrov və Türkiyənin Xarici İşlər naziri Mövlud Çavuşoğlu əldə olunan razılaşma sənədinin mətnini oxuyublar.
Sənədə əsasən, Suriyada atəşkəs martın 6-na keçən gecə saat 1-də qüvvəyə minir.
