Əzimə Ağalarovanın kitabı İsveç dilində çap olundu
Azərbaycanlı yazıçı Əzimə Ağalarovanın “Bakıdan Qahirəyə və Stokholma uzanan yol” adlı kitabı İsveç dilində işıq üzü görüb.
Rakus.az xəbər verir ki, Səadət Kərimlinin tərcümə etdiyi kitab İsveçin “Ulf Diskion” nəşriyyatı tərəfindən çap edilib. Əsərdə ötən əsrin 60-cı illərində yaşayan azərbaycanlı gənc qadının həyatından bəhs edir. İstəmədən sovet xüsusi xidmət orqanlarının agentinə çevrilən gənc xanım SSRİ-nin Qahirədəki səfirliyində diplomatik xidmətə yollanır. Burada ona Asuan bəndinin inşasında çalışmaq tapşırığı verilir və o, yeni adla fəaliyyətə başlayır. Elə bununla da onun təhlükələrlə, xəyanət və yalanlarla dolu çətin həyat yolu başlayır. Məhz burada o, isveçli aristokratla olan böyük sevgini yaşamalı olur. Romanın qəhrəmanları sovet təhlükəsizlik xidmətinin bütün çətinliklərinə baxmayaraq, sevgilərini qoruyub saxlayırlar.
Xatırladaq ki, 27 ildir Avropada yaşayan yazıçının “Bakıdan Qahirəyə və Stokholma uzanan yol” adlı kitabı 2014-cü ildə Bakıda, 2015-ci ildə isə İsveçdə ingilis dilində çap edilib. İngilis dilində çap edilmiş kitab Avropanın 6 ölkəsində satışa çıxarılıb. Əzimə Ağalarovanın kitabları qardaş Türkiyədə də işıq üzü görüb.
