“Sabah”ın futbolçusu ailəlikcə virusa yoluxdu
“Sabah” klubunun futbolçusu Məhəmməd Mirzəbəyovun ailə üzvləri koronavirusa yoluxub.
Rakus.az xəbər verir ki, bunu “Report”a Azərbaycan millisinin sabiq müdafiəçisinin özü məlumat verib.
Otuz yaşlı oyunçunun sözlərinə görə, yoluxma Rusiyada Dağıstan Respublikasının İzberbaş şəhərində yaşayan valideynləri, iki qardaşı və onların həyat yoldaşlarında müşahidə olunub.
Mirzəbəyov ailə üzvlərinin hazırda ev şəraitində təcrid olunmuş vəziyyətdə müalicə aldıqlarını və vəziyyətlərinin normal olduğunu vurğulayıb: “Onlar özlərini narahat hiss etdikdə tibb işçisi olan həyat yoldaşıma zəng etdilər. Xanımım isə Dağıstanda koronavirus xəstələrinin müalicəsi ilə məşğul olan həkim rəfiqələri ilə əlaqə saxladı. Həmin həkimlər isə müalicə yazdılar. Həm müalicə, həm də Allahın köməyi ilə ailə üzvlərimin vəziyyəti yaxşılığa doğru gedir”.
Xatırladaq ki, “Sabah”a 2019-cu ilin iyununda keçən Məhəmməd Mirzəbəyov əvvəllər Azərbaycanda “Sumqayıt”, “İnter”, “Qəbələ” və “Neftçi”nin formasını geyinib. O, milli komandaya 2015 – 2018-ci illərdə dəvət alıb.
