Statistika Komitəsi əhali ilə bağlı statistikanı açıqladı
İlin əvvəlindən ölkə əhalisinin sayı 14 473 nəfər və ya 0,1 faiz artaraq 2020-ci il may ayının 1-i vəziyyətinə 10 081 581 nəfərə çatıb.
Rakus.az xəbər verir ki, bu barədə Dövlət Statistika Komitəsindən məlumat verilib.
Bildirilib ki, əhalinin 52,8 faizi şəhər, 47,2 faizi kənd sakinləri, 49,9 faizi kişilər, 50,1 faizi isə qadınlardır.
İlin yanvar-aprel aylarında Ədliyyə Nazirliyinin rayon (şəhər) qeydiyyat şöbələri tərəfindən ilkin məlumatlara əsasən 34 749 doğulan körpə qeydə alınıb.
Əhalinin hər 1 000 nəfərinə bu göstərici 10,6 təşkil edib. Doğulanların 53,1 faizi oğlan, 46,9 faizi isə qız uşaqlarıdır.
Doğulan körpələrdən 912-si əkiz, 30-u isə üçəmlər olub.
Bu ilin yanvar-aprel ayları ərzində qeydiyyat şöbələri tərəfindən 13 738 nikaha daxilolma və 4 287 boşanma halları qeydə alınıb.
Əhalinin hər 1000 nəfərinə nikahların sayı 4,2, boşanmaların sayı isə 1,3 olub.
Bu ilin dörd ayında ölkə üzrə 20 519 ölüm halı qeydə alınıb və əhalinin hər 1000 nəfərinə ölüm səviyyəsi 6,2 təşkil edib.
