Şanxay Beynəlxalq Film Festivalı başladı
İyulun 25-də Şanxay Beynəlxalq Film Festivalı (SIFF) pandemiya ilə əlaqədar proqramını qısaltmaqla bir çox tədbirlərini onlayn rejimə keçirib.
Rakus.az xəbər verir ki, filmlərin bütün nominasiyalar üzrə seçilməsinə baxmayaraq, qaliblərə mükafatlar verilməyəcək. İştirakçıların hər il mükafatlandırma mərasimindən əvvəl xalça üzərindən keçməsi də baş tutmayacaq. Əsas mərasimin keçirilməsi də pandemiya ilə əlaqədar ləğv olunub.
İzolyasiya müddətində böyük ekrandan ötrü darıxmış çinli kino həvəskarları iyulun 20-dən etibarən kinoteatrları ziyarət etmək fürsəti qazanıblar.
Festivalın budəfəki proqramına 320 rejissor işi daxil edilib. Filmlərə Şanxayın 29 kinoteatrında baxmaq mümkün olacaq.
Biletlərin onlayn satışı artıq iyulun 20-dən başlanıb və kinosevərlər arasında ajiotaj yaradıb. İlk saatlarda rəsmi məlumata görə, 128 mindən çox bilet satılıb.
Festival avqustun 2-dək davam edəcək.
Xatırladaq ki, Şanxay Beynəlxalq Film festivalı 1993-cü ildən keçirilir. Festivalın münsiflər heyətinə müxtəlif vaxtlarda Oliver Stoun və digər dünya şöhrətli kinematoqrafçılar daxil olub.
