Çobanın qoyunlara müraciəti: “Mən elə sizəm”
“Hörmətli qoyunlar, mənim dostlarım, vətəndaşlarım, hökmdarım! Düşünməyin ki, mənim ota və suya münasibətim sizinkindən fərqlidir”.
Rakus.az xəbər verir ki, bu fikri təhsil üzrə ekspert Etibar Əliyev paylaşaraq qeyd edib ki, böyük fransız filosofu Alen “Gözəllik və həqiqət” kitabında qoyunlara maraqlı bir esse həsr edib. O yazır:
“Platondan sonra qoyun siyasəti haqqında tədqiqatlarımı davam etdirərkən birdən anladım ki, qoyunların çobanın üzərində sonsuz hakimiyyəti olur. Əgər qoyun arıqlayırsa və yunu azalırsa, çobanı fikir götürür. Qoyunun arıqlaması çoban üçün nə deməkdir? O, həmin saat bunun səbəbləri üzərində baş sındırmağa başlayır: ota və suya baxır, itin davranışına diqqət edir”.
Bu essedə çobanın qoyunlarına müraciəti də maraqlıdır: “Hörmətli qoyunlar, mənim dostlarım, vətəndaşlarım, hökmdarım! Düşünməyin ki, mənim ota və suya münasibətim sizinkindən fərqlidir. Əgər deyirlərsə ki, mən sizi idarə edirəm, inanın ki, bu, belədir, inciməyin. Mən sizin mülahizələrinizə böyük önəm verirəm. Siz mənə nəyin xoşunuza gəlib-gəlmədiyini başa salmalısınız. Bunu etməlisiniz ki, bu haqda çox düşünməyək. Mən sizin yaddaşınızam, bəsirətinizəm. Əgər mən sizi şirnikləndirən hansısa xoşunuza gələn hərəkəti etməyə; məsələn, yaşıl otu qırpmağa, yaxud günün altında yatmağa icazə vermirəmsə, inanıram ki, siz buna heyfsilənirsiniz. Sizin iradəniz mənim iradəmə hakimdir. Mənim iradəm sizin iradənizdir. Əlqərəz, mən elə sizəm”.
