Cüdoçumuz bürünc medal qazandı - FOTO
İtaliyanın Neapol şəhərində Tələbələrin XXX Yay Universiadası çərçivəsində keçirilən cüdo yarışlarına yekun vurulub. Rakus.az xəbər verir ki, Universiadada 6 (5 kişi, 1 qadın) idmançı ilə təmsil olunan Azərbaycan yığması iyulun 7-də komanda yarışlarında mübarizə aparıb. Kişi cüdoçularımız yarışda Türkmənistan, Almaniya və Fransa yığmalarını məğlub edərək yarımfinala vəsiqə qazanıblar. Bu mərhələdə Rusiya komandasına uduzan Azərbaycan millisi bürünc medal uğrunda görüşdə Braziliya cüdoçularına 3:2 hesabı ilə qalib gəlib. Beləliklə, Azərbaycan cüdoçuları XXX Ümumdünya Yay Universiadasının komanda yarışlarının bürünc medalına layiq görülüblər. Bürünc medal qazanan idmançılar arasında komandamızın bayraqdarı, “Judo Club 2012”nin üzvü Murad Fətiyev (81 kq) də var. Cüdoçumuza Napoli Universiadasının bürünc medalı təqdim olunub.
Xatırladaq ki, Yaponiya komandası da yarışda 3-cü yeri tutub. Rusiya komandası qızıl, Koreya isə gümüş medala sahib çıxıb.
Məlumat üçün bildirək ki, Azərbaycan idmançıları əvvəlki günlərdə keçirilən cüdo üzrə fərdi yarışları 1 gümüş medalla başa vurublar. Yeganə medalı komandamıza 73 kq çəki dərəcəsində çıxış edən Hidaymmət Heydərov qazandırıb. Cüdoçumuz Birləşmiş Ərəb Əmirlikləri, Misir, Fransa, Monteneqro və Monqolustan idmançılarına qalib gələrək finala yüksəlib. Həlledici görüşdə rusiyalı Yevgeni Prokopçuka uduzan Hidayət universiadada güqq müş medala sahib çıxıb.
Xatırladaq ki, Hidayət Heydərov Azərbaycanın Əməkdar məşqçisi, “Judo Club 2012”nin baş məşqçisi Tərlan Həsənovun yetirməsidir.
Fərdi yarışlarda iştirak edən “Judo Club 2012”nin üzvü Murad Fətiyev isə ilk görüşdə hollandiyalı Yim Heymana məğlub olaraq mübarizəni dayandırıb.
