Deputat AŞPA-da miqrant uşaqlarla bağlı rəy bildirdi
AŞPA-nın “Avropada uşaq yoxsulluğuna son qoyulması”, “Silahlı münaqişələrdən təsirlənən uşaqların müdafiəsi” və “Təməl səbəblərə qarşı mübarizə yolu ilə uşaqların radikallaşmasının qarşısının alınması” üzrə məruzəçisi kimi, uşaq hüquqlarının qorunmasına çox əhəmiyyət verirəm və bu mühüm hesabata töhfə vermək mənim üçün böyük şərəfdir.
Silahlı qarşıdurmalar nəticəsində uşaqlar və onların ailələri daha yaxşı və daha təhlükəsiz həyat axtarmaq üçün evlərini tərk edirlər, lakin yeni məkan xoşbəxt həyata zəmanət vermir. Uşaqlar müxtəlif çətinliklərlə və yoxsulluqla üzləşirlər. Çətin sosial və maliyyə şəraitində yaşamaq onların radikallaşmasına səbəb olur. Bu hesabat miqrant uşaqların bütün bu problemlərini bir araya gətirib və üzv ölkələrə düzgün mesajlar göndərir. Bu səbəbdən irəli sürülən təşəbbüsü və işləri yüksək qiymətləndirirəm.
Rakus.az xəbər verir ki, bu fikirləri AŞPA-nın yay sessiyasında “Miqrant uşaqlara qarşı zorakılıq və onların istismarına son qoymaq” adlı məruzənin müzakirələri zamanı bu mövzu üzrə rəyçi məruzəçi, nümayəndə heyətimizin üzvü Sevinc Fətəliyeva söyləyib.
Deputat bildirib ki, miqrant əhali arasında müşayiət olunmayan uşaqların sayı sürətlə artır və bu, ciddi narahatlıq doğurur. Minlərlə uşaq Avropa məkanında həbsxanaya bənzər şəraitdə yaşamalı olur. Bu vəziyyət cəmiyyətlərimiz daxilində zorakılıq və münaqişələri artıra bilər. Bu məsələdə maliyyə dəstəyi vacibdir. Lakin fərdi üzv dövlətlər miqrant probleminin həllinə böyük həcmdə maliyyə resursları cəlb etsələr də, daha güclü siyasi öhdəliyə və uşaqların rifahının prioritet elan olunmasına ehtiyac var.
Azərbaycanlı deputat məruzəçinin təhlükəsiz, hüquqi və müntəzəm miqrasiya üçün kanallar yaradılmasını və bununla uşaqlar, onların ailə üzvləri üçün təhlükəsizlik tədbirlərini gücləndirməyi vacib saymasını yüksək dəyərləndirib. Vurğulayıb ki, ailənin birləşməsi bu prosesin vacib bir hissəsidir. Deputat Avropa Şurasının insan haqları üzrə keçmiş komissarı Nils Muiznieksin Avropa İttifaqının “Ailə birləşməsi normativləri”nin tətbiqinin tez-tez mübahisələr doğurmasına və Dublin Ailə Birliyinin təmin edilməsində təsirli olmamasına diqqət çəkib. Bildirib ki, keçmiş komissar müvafiq qanunlar, siyasət və təcrübənin nəzərdən keçirilməsi üçün 36 tövsiyə hazırlayıb və bu sahədə məhdudiyyətlərin ləğv edilməsinin vacibliyini vurğulayıb. S.Fətəliyeva ölkələri müvafiq qanunvericiliyin nəzərdən keçirilməsi zamanı həmin tövsiyələrdən faydalanmağa dəvət edib. O, bu sahədə müxtəlif tədbir və öhdəliklərin tətbiqinin müsbət nəticələr verdiyini diqqətə çatdırıb, bu tədbirlərin aidiyyəti uşaqların, cəmiyyətlərin rifahının yaxşılaşdırılmasında potensialından danışıb. Belə tədbirləri inkişaf etdirmək və müvafiq siyasəti həyata keçirmək üçün siyasi iradə və resursların əhəmiyyətinə toxunub. Qeyd edib ki, uşaqlara sığınacaq imkanları və digər hüquqlar barədə yaşlarına uyğun məlumatlar verilməlidir.
Azərbaycanlı deputat təklif edib ki, Assambleya Avropa Parlamentini Avropa İttifaqının ünvanlı yardımını və miqrasiyanın idarə edilməsinin üçüncü ölkələrə həvalə edilməsini nəzərdən keçirməyə çağırsın. Bu addım həmin ölkələrdə miqrantlara qarşı qeyri-insani və alçaldıcı davranışlara, onların təməl hüquqlarının təmin edilməməsinə və uşaqların kəskin zorakılıq və məhrumiyyətlərə məruz qalmasına son qoyar.
Diqqətə çatdırıb ki, Assambleya miqrasiya kontekstində uşaqların həbsxanada saxlanmasına qarşı mübarizə aparır. Miqrant uşaqlar üçün qəbul mərkəzləri həbsxana tipli olmamalı, açıq qurumlar olmalı, onların saxlanmasına haqq qazandırılması kimi yanlış anlaşılmamalıdır. Ən həssas qrupları xüsusi diqqətdə saxlamaqla uşaqların hüquqlarının qorunmasını təmin etməyə və daha təhlükəsiz dünya qurmağa imkan verəcək.
