DMX rəisi mətbuat konfransında FAKTLARI açıqladı
Dövlət Miqrasiya Xidmətinin (DMX) rəisi Vüsal Hüseynov “Pandemiya dövründə Dövlət Miqrasiya Xidmətinin fəaliyyəti və ölkəmizdə olan əcnəbilərə göstərilən xidmətlər” mövzusunda onlayn mətbuat konfransı keçirdi.
Rakus.az xəbər verir ki, onun sözlərinə görə, pandemiya tədbirləri çərçivəsində readmissiya prosesi dayandırılıb.
“Bu proses sərhədlər bağlanan gündən bu məqsədlə Azərbaycana geri qaytarılma həyata keçirilməyib. Pandemiya dövründə Dövlət Miqrasiya Xidməti fasiləsiz fəaliyyət göstərilib”, – o bildirib.
Hazırda Azərbaycanda 134 298 nəfər əcnəbinin yaşadığını vurğulayan DMX sədri deyib: “Həmin şəxslər daha çox Rusiya, Gürcüstan, İran və s ölkələrin vətəndaşlarıdır. Pandemiya ölkəmizdə əcnəbilərin olmasına da mənfi təsir göstərib”.
O diqqətə çatdırıb ki, ölkəmizdə yaşayan əcnəbilər arasında koronavirusa yoluxanlar və karantinə yerləşdirilənlər də olub.
V.Hüseynov yoluxan şəxslər barədə dəqiq rəqəmlərin onda olmadığını bildirib.
“Bu gün bütün dünyada pandemiya hökm sürür. Ona görə də deportasiya prosesi dayandırılıb. Əgər barələrində deportasiya qərarı verilən şəxslər varsa, onlar da qərarın icrasının vaxtını gözləyirlər. Bu proses sərhədlərin bağlanması ilə əlaqədar dayandırılıb” – o bildirib.
Onun sözlərinə görə, ölkədə olma müddətinin uzadılması üçün müraciət edən şəxslər üçün dövlət rüsumlar qanunverciliklə müəyyən edilib. Müddətin uzadılması üçün olan rüsum bir ay üçün 30 manat, iki ay müddət üçün 60 manat və yetkinlikyaşına çatmayanlar üçün 15 manat müyyən edilib. Mayın 31-ə kimi ölkədə olma müddətinin uzadılması ilə qərardan sonra həmin şəxslərdən ödəniş tələb edilmir.
