“Əgər İrəvanda qazıntılar aparılsa, oradan yalnız Azərbaycan izləri çıxacaq” – MÜSAHİBƏ - FOTO - VİDEO

Bu gün Qərbi Azərbaycan Xronikası layihəsi çərçivəsində rus dilində ilk buraxılışı efirə gedib.

Rakus.az xəbər verir ki, aparıcı Ellada Sarvanın müsahibi ictimai xadim, “Vətəndaşların Sosial Rifahı Naminə” İctimai Birliyinin sədri İradə Rizazadə olub.

O deyib ki, İrəvana nə qədər erməni yerləşdirilirdisə, ondan daha çox azərbaycanlı çıxarılırdı: “Azərbaycanlılar küçənin ortasında öldürülürdü. Ermənilər uşaqlarını “türklər bizim düşmənimizdir” ruhunda böyüdüblər. Onlar mənim babamı mülkündə məskunlaşıblar. Əgər İrəvanda qazıntılar aparılsa, oradan yalnız Azərbaycan izləri, tarixi çıxacaq”.

Onun sözlərinə görə, azərbaycanlıların yaşadığı torpaqda qondarma soyqırıma abidə ucaldılıb: “1988-ci ildə tamamilə məhv edilən müsəman məscidlərinin sənədlərini saxlamışam. Babamın bütün əmlakını ermənilər zəbt ediblər, 40 otaqdan sadəcə 2 otaq qalır. Ermənilər özləri etiraf edir ki, bu yerlərə gəlmədilər”.

İ.Rizazadə indiki Ermənistanın paytaxtı, qədim oğuz-türk yurdu olan İrəvanın coğrafi-siyasi məkan kimi Qərbi Azərbaycan, eləcə də Azərbaycan üçün böyük məna daşıdığını, bu məkanın həm tarixi şəxsiyyətləri, həm toponimləri, həm də etnik tərkibi ilə məhz azərbaycanlılara, türklərə aid olduğunu bildirib, ermənilərin İrəvana gəlişindən, İrəvan şəhərində çox gerçəkliklərin – vəhşiliklərin, saxtakarlıqların şahidi olduğunu, şovinist hadisələrin İrəvanda daha çox baş verdiyini vurğulayıb.

Ermənilərin zaman-zaman azərbaycanlıları pərən-pərən salıb, türklərə məxsus məhəllə, küçə, abidə və toponimləri məhv etdiyini deyən ictimai xadim ermənilərə öz dillərində müraciət edib.

İctimai Birliyin sədri İrəvanda tarixi məscidlərin, o cümlədən Dəmir Bulaq məscidinin, mülklərin sənədlərini göstərib, bir irəvanlı kimi doğma yurda qayıdacağımıza, orada azərbaycanlıların mühitinin yaranacağına əminliyini söyləyib, Qərbi azərbaycanlıların Vətənə qayıdışının reallığa çevrilməsi üçün aparılan bugünkü siyasəti yüksək qiymətləndirib.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş oktyabrın 10-da saat 19:30-da Baku Tv-nin efirində və Youtube kanalında rus dilində yayımlanıb.