Ərdoğan Qarabağın azadlığından danışdı - FOTO
“Ermənistanın sentyabrın 27-də başlatdığı hücumun ardından şanlı Azərbaycan Ordusu işğal altındakı Qarabağı və ətraf əraziləri azad etmək üçün uğurlu əməliyyat gerçəkləşdirib”.
Rakus.az xəbər verir ki, bunu Türkiyə Prezidenti Rəcəb Tayyib Ərdoğan Azərbaycana səfərə yola düşməmişdən əvvəl keçirdiyi mətbuat konfransında deyib.
“Öz ərazilərində verdiyi 44 günlük Vətən müharibəsi nəticəsində Azərbaycan Ordusu Dağlıq Qarabağı işğaldan azad edib. Qarabağda 30 ildir davam edən ədalətsizlik başa çatdı”, – o qeyd edib.
Onun sözlərinə görə, Vətən müharibəsi dövründə Azərbaycan xalqı həmrəylik göstərərək heç bir fədakarlıqdan qaçmadı.
“Ermənilərin dinc sakinləri hədəfə aldığı hücumlara baxmayaraq, Azərbaycan öz haqlı mübarizəsinə kölgə salmayıb. Müharibə şəraitində belə türk və müsəlman olmanın əsalətini unutmayan azərbaycanlı qardaşlarımızı öz adımdan və millətimin adından təbrik edirəm. Canları bahasına Qarabağı işğaldan azad edən əziz şəhidlərimizə Allahdan rəhmət, qazilərimizə şəfa diləyirəm. Həmd olsun, bu gün ulduz və hilal Qarabağ səmasında qürurla dalğalanır”, – o deyib.
