“Erməni alimləri yazırlar ki, tarixdə “Böyük Ermənistan” olmayıb” - FOTO - VİDEO
Bu gün Baku Tv-də Qərbi Azərbaycan Xronikası layihəsi çərçivəsində rus dilində növbəti buraxılış efirə gedib.
Rakus.az xəbər verir ki, aparıcı Ellada Sarvanın müsahibi Azərbaycan Milli Elmlər Akademiyasının Tarix İnstitutunun Qərbi Azərbaycan şöbəsinin müdiri Cəbi Bəhrəmov olub.
O, Qərbi Azərbaycanın coğrafi-siyasi məkan kimi tarixindən və əhəmiyyətindən söz açıb, İrəvan quberniyasının ərazisində 199 kəndin ermənilər tərəfindən dağıdıldığını, Müsəlman Milli Şurasının İrəvanı ermənilərə vermək qərarından danışıb.
Onun sözlərinə görə, sovet Rusiyası daşnak Ermənistan ilə gizli danışıqlar aparırdı: “Azərbaycan KP MK-sının icraçı katibi, Bakı Fəhlə və Qırmızı Ordu Əsgərləri Sovetinin sədri, Azərbaycan KP MK bürosunun üzvü olan Qriqori Kaminskinin təşəbbüsü ilə Zəngəzurun qərb hissəsi Ermənistan SSR-ə verildi. 1926-1929-cu illərdə Levon Mirzoyan Azərbaycan SSR-nin başçısı oldu. On il ərzində Ermənistanın ərazisi 29,8 min kv. Kilometrə çatıb”.
Tarixçi-alim deyib ki, İrəvan şəhərinin ermənilərə verilməsi ilə bağlı hüquqi əsası olan heç bir sənəd yoxdur: “Torpaqların verilməsinə qərar veriləndə Azərbaycan xalqından soruşulmayıb. Referendum keçirilməyib. Bizim torpaqların Ermənistana verilməsi ilə bağlı qəbul edilmiş qərarları ləğv etmək hüququmuz var”.
C.Bəhrəmov ermənilərin “Böyük Ermənistan” iddiasına da aydınlıq gətirib: “Erməni alimləri özləri yazır ki, tarixdə “Böyük Ermənistan” olmayıb. Böyük bir ölkənin ən azı bir xüsusiyyəti olmalıdır. Cənubi Qafqaz ərazisində Ermənistanın olmadığını sübut etmişik. Ermənilər azərbaycanlıların hüquqlarını pozaraq onları deportasiyaya məruz qoyub. Ermənistan bütün cinayətlərə görə ən yüksək səviyyədə cavab verməli olacaq”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş oktyabrın 24-də saat 18:30-da Baku Tv-nin efirində və Youtube kanalında rus dilində yayımlanıb.
