“Ermənilər ictimai şüurunu dəyişməyincə onlar üçün yaxşı heç nə olmayacaq” – MÜSAHİBƏ - VİDEO

Bu gün Baku Tv-də Qərbi Azərbaycan Xronikası layihəsi çərçivəsində rus dilində növbəti buraxılış efirə gedib.

Rakus.az xəbər verir ki, aparıcı Ellada Sarvanın müsahibi, Əməkdar İncəsənət Xadimi, kinoşünas Ayaz Salayev olub.

O, dünyada, eləcə də bölgədə gedən ictimai-siyasi proseslərdən, gərginliklərdən söz açıb, müharibə, münaqişə və ixtilafların mədəniyyətin inkişafına mane olduğunu söyləyib.

Onun sözlərinə görə, vaxtilə Qarabağda zəfər əldə olunacağına inanmayıb: “Həqiqətən də inanmırdım ki, yenidən Xankəndi küçələrində gəzmək fürsəti əldə edəcəm. Bu bizim üçün böyük sürpriz və tarixi unudulmaz qələbədir”.

Vaxtilə “Erməni soyqırımı” abidəsinin açılışı günü ermənilər azərbaycanlıların yaşadığı məhəllələri dağıtmağa başladığını bildirən A.Salayev erməni jurnalistlərindən sitat gətirib: “Biz türklərlə işğalçı kimi davranırıqsa, azərbaycanlılar da bizə elə yanaşacaqlar. Ona görə də ermənilər ictimai şüurunu dəyişməyincə onlar üçün yaxşı heç nə olmayacaq”.

Əməkdar İncəsənət Xadimi beynəlxalq tədbirlərdə erməni sənətkarlarla söhbətlərdə onların bu proseslərə baxışlarının çox dəyişdiyini bildirib, erməni şair Sayat Novanın günümüzə qədər gəlib çatmış əsərlərin çoxunu Azərbaycan dilində qələmə aldığını vurğulayıb: “O, həqiqətən də Azərbaycan dilində erməni dilindən iki dəfə çox şeir yazıb”.

İndiyədək 18 filmin yaranmasında əməyi olan künoşünas sonuncu  “Torpaq” filmi haqqında danışaraq deyib ki, bu, Qərbi Azərbaycan mövzusuna həsr olunub: “Bu filmin yaranması öz doğma yurdlarından qovulan insanların acı taleyindən bəhs edir. “Toroaq” filmi iki problemi qabardır: Qarabağ və Qərbi Azərbaycan. Ekran əsərində 100 azərbaycanlı qaçqınla müsahibə aparılıb. Nəticə odur ki, qaçqınların xatirələri yaxşı deyil”.

A.Salayev Qərbi azərbaycanlıların doğma ocaqlarına qayıdışı barədə də danışıb: “Azərbaycan dünya tarixini yazan ölkələrdən biridir. İndi yeganə bir arzu qalıb – Qərbi Azərbaycana qayıtmaq”.

Xatırladaq ki, Qərbi Azərbaycan Xronikası layihəsinin məqsədi tarixi qədim  torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz  qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş dekabrın 26-da saat 18:30-da Baku Tv-nin efirində yayımlanıb.