Həqiqət carçısı “Haber Global” 7 yaşını qeyd edir
Bu gün regional və beynəlxalq informasiya məkanında mühüm rol oynayan “Haber Global” telekanalının fəaliyyətə başlamasından 7 il ötür.
Rakus.az xəbər verir ki, Türkiyə teleməkanında qısa zaman kəsiyində böyük uğur qazanan “Haber Global” 2018-ci il sentyabrın 24-də yayıma başlayıb. Bu xəbər telekanalı fəaliyyət göstərdiyi ilk gündən etibarən Azərbaycan həqiqətlərini və maraqlarını qoruyaraq bütün mühüm mövzuları daim diqqət mərkəzində saxlayır, müntəzəm olaraq ölkəmizlə bağlı həqiqətləri operativ şəkildə geniş tamaşaçı auditoriyasına təqdim edir. Telekanalın yayımladığı proqramlar və xüsusi layihələr Türkiyə və Azərbaycanda geniş izləyici kütləsinin rəğbətini qazanıb. Xüsusilə, Vətən müharibəsi dövründə Azərbaycana göstərdiyi informasiya dəstəyi ilə “Haber Global” həm Türkiyə, həm də Azərbaycan tamaşaçılarının yüksək qiymətləndirdiyi kanallardan birinə çevrilib. Kanalın İkinci Qarabağ müharibəsi zamanı cəbhə xəttində baş verən hadisələri, erməni separatçılarının dinc əhaliyə qarşı hücumlarını dünya ictimaiyyətinə çatdırılmasında əvəzsiz rolu olub. “Haber Global” Azərbaycan və Türkiyə arasındakı dostluğun və iş birliyinin inkişafına özünəməxsus töhfələr verib. Kanalın təcrübəli və peşəkar komandası azərbaycanlı jurnalistlərə mütəmadi təlimlər keçərək öz bilik və bacarıqlarını onlarla bölüşüb. Bu illər ərzində “Haber Global”da yayımlanan verilişlər böyük tamaşaçı marağına səbəb olaraq auditoriyasını Türkiyə və Azərbaycanda daha da genişləndirib. Bu günə kimi televiziyanın istehsalı olan bir sıra layihələr müxtəlif yerli və beynəlxalq festivallarda yüksək qiymətləndirilərək mükafatlara layiq görülüb.
“Haber Global” telekanalının kollektivini 7 illik münasibətilə təbrik edir, yaradıcılıq uğurları arzulayırıq!
