Heydər Əliyev Azərbaycana əbədi inkişaf bəxş edib
YAP Qaradağ rayon təşkilatının İdarə Heyətinin və Siyasi Şurasının keçirilən videokonfransında əvvəlcə “Ümummilli lider Heydər Əliyev müasir Azərbaycan dövlətinin qurucusudur” mövzusu ətrafında danışıldı.
Rakus.az xəbər verir ki, təşkilatın sədri, YAP-ın Siyasi Şurasının üzvü, Milli Məclisin deputatı Aydın Hüseynov bu barədə danışaraq qeyd etdi ki, Azərbaycan xalqının Ümummilli lideri Heydər Əliyevin fədakar əməyi, qətiyyəti, möhkəm siyasi iradəsi sayəsində müasir Azərbaycanın dövlətçiliyinin siyasi, iqtisadi əsasları yaradılmış, müstəqil Azərbaycan dünya məkanında öz layiqli yerini tutmuşdur. Ulu öndərin Azərbaycana rəhbərlik etdiyi bütün dövrlər minilliklər boyu davam edən dövlətçilik tariximizin şanlı səhifəsidir. Bu mərhələ Azərbaycanda müstəqilliyin əbədi və dönməz xarakter alması, dövlətçiliyin möhkəmləndirilməsi, iqtisadi inkişaf üçün möhkəm təməlin yaradılması, milli-mənəvi yüksəliş, hər bir fərdin özünü layiqli vətəndaş olaraq dərk etməsi ilə müasir tariximizə əbədi həkk olunmuşdur.
Azərbaycanın hərtərəfli inkişafı, gələcək tərəqqisi üçün möhkəm əsasların yaradılması zəngin təcrübəyə, böyük istedada, parlaq zəkaya, ali mənəvi keyfiyyətlərə, yüksək siyasi idarəçilik və liderlik qabiliyyətinə, tükənməz enerjiyə malik Heydər Əliyevin sosial-iqtisadi strategiyasının həyata keçirilməsi nəticəsində mümkün olmuşdur.
Qeyd olundu ki, Heydər Əliyev həmişə qurub-yaratmaq, inkişaf etdirmək amalı ilə çalışmış və hansı vəzifədə olmasından asılı olmayaraq dövlət işlərinə sədaqətlə xidmət etmişdir. Onun təşəbbüskarlığı və gərgin əməyinin məhsulu olan Baykal-Amur magistralı, dəmir yolları, körpülər, yol və geniş miqyaslı nəqliyyat qovşaqları, infrastruktur layihələri, mühüm strateji dövlət obyektləri tikilib istifadəyə verilmişdir.
Təşkilatın sədri bildirdi ki, Ulu öndər Heydər Əliyevin əsasını qoyduğu möhtəşəm inkişaf salnaməsi Onun siyasi varisi, yeni güclü lider, Prezident İlham Əliyev və Birinci vitse-prezident Mehriban xanım Əliyeva tərəfindən uğurla davam etdirilərək Azərbaycanın inkişaf piramidasının yeni obrazını yaradıblar. Ötən illər ərzində ölkəmiz sürətli iqtisadi tərəqqiyə çatıb, dünyanın ən inkişaf etmiş dövlətlərindən birinə çevrilib, ölkəmizin hər bir vətəndaşı layiqli və ləyaqətli sosial həyat, şəraitlə təmin olunuşdur.
Təşkilatın Siyasi Şurası üzvlərinin fikirləri dinlənildikdən sonra gündəlikdə duran digər məsələ – 3 ərazi partiya təşkilatı üzvlüyə qəbul olundu.
Sonda YAP Qaradağ rayon təşkilatının 2020-ci ilin birinci rübünün hesabatı dinlənildi və qarşıda duran vəzifələr müzakirə olunaraq qəbul edildi.
