Hümbət Hüseynov: “Bu cür yanaşma bələdiyyələrin fəaliyyətinə zərbədir”
Bu günlərdə millət vəkili Razi Nurullayev bələdiyyələrin fəaliyyətini sərt tənqid edərək 1999-2009-cu illərdə bələdiyyəyə seçilənlərin torpaqları satdıqlarını, onların fəaliyyətinin yoxlanmalı olduğunu bildirib, hətta daha irəli gedərək “ciddi həbslərə” səsləyib.
Rakus.az xəbər verir ki, məsələyə münasibət bildirən Azərbaycan Qəsəbə Bələdiyyələri Milli Assosiasiyasının sədri, M.Ə.Rəsulzadə bələdiyyəsinin sədri Hümbət Hüseynov deyib:
“Bələdiyyələrin fəaliyyətinə bu cür yanaşma yanlışdır. Mən də 2009-cu ildən bələdiyyədə təmsil olunuram. O illərdən mənim kimi bələdiyyə institutunda çalışan, bu sahəni mənimsəyən və təhlil edə bilən onlarla, yüzlərlə peşəkarlar var. O illərdə çalışanların hamısının həbs olunmasına çağırış 20 illik fəaliyyəti dövrlərə bölmək, parçalanma yaratmaqdır, bütövlükdə bələdiyyələrin fəaliyyətinə zərbədir.
Millət vəkili soruşur: “Bələdiyyələr elan edir ki, bu işləri daxili vəsait hesabına edirik. Daxili vəsait nə deməkdir?” Düşünürəm ki, əvvəla, bir seçkili orqanın nümayəndəsinin digər seçkili orqanın nümayəndələrinin fəaliyyəti haqqında bəsit bilgilərə malik olmaqla hər hansı fikir yürütməsi ən azı qeyri-peşəkarlıqdır. Maraqlıdır, “bələdiyyələrin daxili vəsaiti nə deməkdir?” bilməyən, bələdiyyə büdcəsinin necə formalaşması haqqında təsəvvürü olmayan Razi müəllim, bələdiyyələrin ümumi fəaliyyəti haqqında necə fikir yürüdə bilər? Digər tərəfdən bu çıxış bütövlükdə bələdiyyələrin 20 illik fəaliyyətinə kölgə salmaq deməkdir. Bəli, qüsur və nöqsanlar var və bu, zaman-zaman səslənib. Eləcə də bələdiyyələr öz fəaliyyətlərində dönüş yaratmağa çalışır. Ötən 20 il müddətində bələdiyyələrin fəaliyyəti formalaşma, daha sonra isə təkmilləşmə mərhələlərini keçib. Bir sıra işlər görülüb və görülür. Amma bələdiyyələrin hamısını rüşvətdə təqsirləndirmək təkcə bələdiyyə üzvlərinin deyil, eləcə də çoxsaylı bələdiyyə qulluqçularının insan hüquqlarının pozulmasıdır”.
