İnsanlıq, mərhəmət və nəciblik Mehriban xanımın fəaliyyəti ilə təcəssüm edir – Deputat
“Azərbaycan Respublikasının Birinci vitse-prezidenti, YAP sədrinin müavini, Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban xanım Əliyeva ölkəmizin ictimai-siyasi həyatında fədakar əməyi və danılmaz xidmətləri ilə seçilir. Humanistliyi, nəcibliyi, qayğıkeşliyi və mərhəməti ilə Azərbaycan qadınının dünyada imicinin yüksəlməsinə böyük töhfə verir. Heydər Əliyev Fondunun rəhbəri kimi həyata keçirdiyi layihələr xalqlar və mədəniyyətlər arasında dostluq mühitinin möhkəmlənməsinə zəmin yaradır”.
Rakus.az xəbər verir ki, bunu açıqlamasında YAP Qaradağ rayon təşkilatının sədri, Milli Məclisin üzvü Aydın Hüseynov deyib.
Millət vəkili bildirib ki, Mehriban xanım görkəmli dövlət xadimi olaraq beynəlxalq aləmdə də böyük nüfuz qazanıb: “Heydər Əliyev Fondunun rəhbəri kimi həyata keçirdiyi çoxsaylı layihələr respublikamızda olduğu kimi xarici ölkələrdə də humanist prinsiplərə bağlılığı ilə seçilir və rəğbətlə qarşılanır. Fond ümummilli lider Heydər Əliyevin fundamental və zəngin irsini lazımi səviyyədə təbliğ etməklə gənclərimizin milli ruhda, vətənpərvər formalaşmasına öz töhfəsini verir. Valideyn himayəsindən məhrum olmuş uşaqlara mütəmadi kömək göstərir, uşaq evlərinin abadlaşdırılmasına xüsusi qayğı ilə yanaşır. Bir sözlə Fondun respublikamızın hüdudlarından kənarda nüfuz qazanması Mehriban xanımın yorulmaz fəaliyyəti və qayğıkeşliyi ilə bağlıdır. Çünki insanlıq, mərhəmət, nəciblik və şəfqət kimi ali insani dəyərlər Mehriban xanımın fəaliyyəti ilə təcəssüm edilir”.
A.Hüseynov mənəvi və intellektual enerjisini ölkəmizin inkişafına yönəltməklə Azərbaycan qadınının ictimai fəaliyyətinin yeni səhifəsini açmış respublikanın birinci xanımı Mehriban xanım Əliyevanı doğum günü münasibətilə təbrik edib: “Həyat yolu və çoxşaxəli fəaliyyəti ilə xalqımızın sonsuz sevgisini qazanan və yüksək etimadını döğruldan Mehriban xanım Əliyevanı təbrik edir, xalqımızın daha yaxşı rifahı və ölkəmizin dinamik inkişafı naminə yeni-yeni uğurlar arzulayıram”.
