Kilian Mbappe ən qiymətli futbolçu seçildi
“CIES Football Observatory” Araşdırma Mərkəzi dünyanın ən qiymətli futbolçularından ibarət reytinq siyahısı tərtib edib.
Rakus.az xəbər verir ki, Avropanın Top-5 liqasında çıxış edən ən bahalı 100 futbolçunun yer aldığı siyahıya Fransa millisinin və “Paris Sen-Jermen” klubunun hücumçusu Kilian Mbappe başçılıq edir.
Pandemiya dövründə yaranmış maliyyə problemindən sonra fransalı hücumçunun qiyməti 259,2 milyon avroya düşüb. İkinci və üçüncü pillədəki futbolçular İngiltərə yığmasının üzvləridir. “Mançester Siti”nin hücumçusu Rahim Sterlinq 2-ci, “Borussiya Dortmund”un yarımmüdafiəçisi Ceydon Sanço isə 3-cü sırada yer alırlar. Dördüncü, beşinci pillələrdə müvafiq olaraq Trent Aleksander-Arnold (“Liverpul”) və Markus Reşford (“Mançester Yunayted”) qərarlaşıblar.
İspaniyanın “Barselona” komandasının argentinalı hücumçusu Lionel Messi 100,1 milyon avro ilə siyahıda 22-ci yerə enib. “Yuventus”un portuqaliyalı ulduzu Kriştiano Ronaldo isə 70-ci pilləyə yuvarlanıb. Transfer dəyəri 62,8 milyon avro olan 35 yaşlı Ronaldo “100-lüy”ün ən yaşlı futbolçusudur.
Ən bahalı qapıçı Ederson Moraeş (“Mançester Siti”), mərkəz müdafiəçisi Matteys de Liqt (“Yuventus”), cinah müdafiəçisi Trent Aleksandr-Arnold (“Liverpul”) müdafiəyə meyilli yarımmüdafiəçi Bruno Fernandeş (“Mançester Yunayted”), orta sahə oyunçusu Frenki de Yonq (“Barselona”), hücumçu isə Kilian Mbappe (PSJ) göstərilib.
