Türk Şurası ölkələri arasında videokonfrans keçirildi
“Koronavirusun yayılmasının qarşısını almaq məqsədi ilə ölkədə şəhərlərarası, rayonlararası nəqliyyatın fəaliyyəti tam dayandırılıb”.
Rakus.az xəbər verir ki, bu barədə Nəqliyyat, Rabitə və Yüksək Texnologiyalar naziri Ramin Quluzadə Azərbaycanın sədrliyi ilə Türkdilli Dövlətlərin Əməkdaşlıq Şurasına (Türk Şurası) üzv ölkələr arasında keçirilən videokonfransda pandemiya ilə bağlı görülən tədbirlərin müzakirəsi zamanı məlumat verib.
O bildirib ki, Azərbaycan ərazisində koronavirusun yayılmasının qarşısını almaq məqsədilə hər sahə üzrə beynəlxalq təcrübəyə əsaslanan tədbirlər görülür:
“Ölkənin bütün sərhədləri sərnişin daşımalarına bağlanıb. Xarici ölkələrdə olan 15 mindən artıq vətəndaşımız çarter təyyarə reysləri ilə ölkəyə gətirilib. Ölkədə şəhərlərarası, rayonlararası nəqliyyatın və Bakı Metropoliteninin fəaliyyəti tam dayandırılıb”.
Azərbaycan ərazisindən 52 min beynəlxalq avtomobil daşıma olub
“Cari ilin I rübündə Azərbaycan ərazisindən 52 min 405 ədəd, o cümlədən tranzit olaraq 20 min 819 ədəd xarici ölkələrin nəqliyyat vasitələri ikitərəfli və Beynəlxalq Nəqliyyat Forumunun çoxtərəfli icazələri ilə sərhəddə icazə almaqla, beynəlxalq avtomobil daşımalarını yerinə yetirib”.
Onun sözlərinə görə, beynəlxalq yük daşımalarının həyata keçirilməsinə ölkəmizdə heç bir məhdudiyyət qoyulmayıb:
“Statistik məlumatların müqayisəsi göstərir ki, bu ilin I rübündə ötən ilin müvafiq dövrünə nisbətən Azərbaycan ərazisindən beynəlxalq avtomobil daşımalarını yerinə yetirən xarici ölkələrin nəqliyyat vasitələrinin sayı 24 faiz, tranzit daşımaların sayı isə 32 faiz artıb”.
