“Məğlubiyyətimizin səbəbi buraxdığımız səhvlərdir” – “Neftçi”nin baş məşqçisi
UEFA Avropa Liqasının II təsnifat mərhələsi çərçivəsində keçirilən “Neftçi” – “Qalatasaray” (1:3) oyunundan sonra ənənəvi mətbuat konfransı keçirilib.
Rakus.az xəbər verir ki, “Neftçi”nin baş məşqçisi Füzuli Məmmədov mətbuat konfransında deyib:
“Qalatasaray” kimi komandalarla oyunlarda kobud səhvlər bağışlanmır. Bu gün məğlubiyyətimizin səbəbi buraxdığımız səhvlərdir.
Rəqib elə komandadır ki, top səviyyədə olan futbolçuları var. Belə komandalar xırda səhvləri bağışlamır. Ona görə də rəqibə maksimum az boşluq verməlisən.
Səlahət Ağayev zədəli idi. Ona görə heyətə əlavə etməmişdik. Stiven Jozef-Monrozun da zədəsi vardı. Prins İbara yeni gəlib. İlk qolunu vurdu. Tədricən o artıracaq.
Etiraf edim ki, “Şkupi” və “Sumqayıt”la oyunlarda bundan daha çox səhv buraxmışdıq. Amma “Qalatasaray” bu komandalardan fərqlidir. Az səhv etsən belə, qapında top görəcəksən. Bu matçda inamlı görünməyimizin səbəbi rəqibin adına görə motivasiyanın yüksək olması idi”.
