“Məhərrəmin son mənzilinə uzanan cığırları heç vaxt ot basmayacaq” - FOTO

Şəhid jurnalist, AZƏRTAC-ın əməkdaşı Məhərrəm İbrahimovun şəhid olmasından üç il ötür. Bununla əlaqədar şəhidin ailə üzvləri, qohumları, AZƏRTAC-ın əməkdaşları, eləcə də Binəqədi Rayon İcra Hakimiyyətinin, M.Ə.Rəsulzadə qəsəbə Bələdiyyəsinin nümayəndələri Müşfiqabad qəsəbəsindəki qəbiristanlığa gedərək, şəhid jurnalist Məhərrəm İbrahimovun məzarını ziyarət ediblər.

Onlar şəhidin məzarı üstünə gül-çiçək dəstələri qoyub, ruhuna dualar oxunub.

Burada keçirilən mərasim iştirakçıları üç il əvvəl iyunun 4-də Kəlbəcər rayonunun Susuzluq kəndinə gedən yolda tank əleyhinə minanın partlaması nəticəsində həlak olan hərbi jurnalist haqqında ürək sözləri söyləyib, xatirələrini bölüşüblər.

Anım mərasimində çıxış edənlər hərbi jurnalistin peşəkarlıq keyfiyyətləri, vətənpərvərlik və işgüzarlığı, dostluq və yoldaşlığı barədə danışıb, Vətən müharibəsi günlərində və postmüharibə zamanı düşmən işğalından azad edilmiş bölgələrdə göstərdiyi fəaliyyətdən bəhs ediblər.

Qeyd olunub ki, Məhərrəm peşə fəaliyyəti ilə əlaqədar Qarabağ bölgəsini və ətraf rayonların işğaldan azad edilmiş ərazilərini demək olar, kəndbəkənd, oba-oba, oymaq-oymaq gəzmişdi. Təəssüf ki, qəfil və faciəli ölüm onun bu fəaliyyətini başa çatdırmağa imkan vermədi. Əslində onun bu işi başa çatdırmağına bir neçə gün, uzağı bir ay-ay yarım vaxt qalırdı…

AZƏRTAC-ın əməkdaşları iş yoldaşlarını ən xoş və səmimi hisslərlə yad ediblər. Onlardan birinin dediyi bu sözlər mərasimin ana xətti kimi səslənib: “Məşhur yazıçı Rəsul Həmzətov deyirdi ki, kimsə mənim öldüyümü xəbər versə, inanmayın, kimsə başdaşımı gördüyünü desə, yenə də inanmayın, kimsə desə ki, mənim başdaşıma gedən cığırları ot basıb, onda ölümümə inanın. Yazıçının dediyi kimi, əsl ölüm unudulanda, xatirələrdən silinəndə baş verir. Şübhəsiz ki, bu müqəddəs yoda canlarını fəda edən digər şəhidlər kimi AZƏRTAC-ın müxbiri Məhərrəm İbrahimovun da son mənzilinə uzanan cığırları heç vaxt ot basmayacaq və bizdən sonrakı nəsillərin də üz tutduğu ziyarət məkanlarından biri olacaqdır”.

Məhrum həmkarımızın qardaşı, jurnalist Əsgər İbrahimov deyib: “Jurnalist fəaliyyətinin ən parlaq dövrlərini AZƏRTAC-da keçirən Məhərrəm adını Azərbaycan jurnalistikası tarixinə qızıl hərflərlə yazdırdı. O, istər müharibə, istərsə də postmüharibə dövründə azad olunmuş bölgələrdən operativ məlumatlar çatdırırdı. Təsəllimiz odur ki, 104 yaşlı AZƏRTAC-ın ilk şəhidi olan Məhərrəm və onunla birgə çalışan həmkarlarının vaxtilə addım-addım, qarış-qarış gəzdikləri ərazilərə həyat qayıdır, sakinlər yurd-yuvalarına dönürlər. Abadlaşan torpaqlardan gələn doğma səslər hamı kimi biz şəhid ailələrini də sevindirir. Həm də ona görə ki, həmin torpaqlarda qardaşımın da ayaq izləri var…”.

Binəqədi Rayon İcra Hakimiyyətinin Səməndər Mənəfov, M.Ə.Rəsulzadə bələdiyyəsinin sədri Hümbət Hüseynov və başqaları çıxış edib Vətən yolunda qəhrəmanlıq nümunəsi göstərən şəhidlərə Allahdan rəhmət diləyiblər.

Şəhidin bacıları İradə İbrahimova və Sevda Əsgərova qardaşlarının xatirəsini əziz tutduqları üçün iştirakçılara minnətdarlıqlarını bildiriblər.

Ölümündən sonra 3-cü dərəcəli “Vətənə xidmətə görə” ordeninə layiq görülən şəhid jurnalistin məzarının ətrafına yaz çiçəkləri düzüləndən sonra mərasim İbrahimovlar ailəsinin Binəqədidəki ata ocağında davam etdirilib. Şəhid jurnalistin ruhuna dualar oxunub, ehsan süfrəsi açılıb.

X X X

Mərmər lövhə üzərindən boylanan, əlində qələm və bloknot tutan tanış sima elə bil ki, gələnləri salamlayır. Üzündəki səmimiyyət, gözlərindəki həyat eşqi həminkidir. Adama elə gəlir ki, indi irəli yeriyib gələnlərin hamısı ilə görüşəcək, hamı ilə bir-bir hal-əhval tutacaq. Arada kiməsə söz də toxuyacaq, kiməsə eyhamlı replika da atacaq və hamı da onun artıq adət etdiyimiz bu şirin atmacalarını, şən zarafat və replikalarını təbəssümlə qarşılayacaq…

Onun xasiyyəti belə idi. Hər şeyə özünəməxsus yumor hissi ilə yanaşar, hər yerdə şən və xoş ovqat yaradardı. Ailə üzvləri, dostları, tələbə və iş yoldaşları, həmkarları Məhərrəm İbrahimovu belə xatırlayırlar.

…Üç ildir ki, Məhərrəm aramızda yoxdur və nə qədər ağır da olsa, onun haqqında keçmiş zamanda danışırıq. Lakin bu üç ildə bir gün də Məhərrəmsiz olmamışıq. Həmişə, hər gün onu xatırlamış, onu yad etmiş, onunla birlikdə olmuşuq. Onunla bağlı söhbətlər, əhvalatlar həmişə xatırlanır, yaddaşlarda yaşayır. Hər səhər iş yerində onun adına yaradılmış guşənin qarşısından adlayıb yazı masasının arxasına keçir, axşam həmin guşənin qarşısından keçib evə tələsirik. Həmkarımızın fiziki ömrü cəmi 39 il davam etsə də, indi onun əbədiyyət ömrü başlayıb. Əbədiyyət ömrünü qazanmaq isə hamıya yox, tək-tək adamlara nəsib olur…