Məktəblilər şəhid jurnalistin doğum gününü qeyd ediblər
Bakının Binəqədi rayonu şəhid Namiq Fərəczadə adına 100 nömrəli tam orta məktəbdə şəhid jurnalist Məhərrəm İbrahimovun doğum günü münasibətilə tədbir keçirilib.
Rakus.az xəbər verir ki, ibtidai sinif müəllimi Arzu Bəkirovanın təşəbbüsü ilə keçirilən tədbirdə məktəbin rəhbər heyəti, müəllimlər, şagirdlər və şəhidin ailə üzvləri iştirak ediblər.
Bildirilib ki, məktəbin qəhrəman məzunu, Vətən müharibəsi şəhidi Məhərrəm İbrahimovun xatirəsinə ehtiram əlaməti olaraq keçirilən bu tədbirdə onun qəhrəmanlıq dolu həyat yolu bir daha yada salınıb: “Qəhrəmanlarımızı yad etmək, onların fədakarlığını gənc nəsillərə çatdırmaq bizim borcumuzdur”.
Şəhidin ailə üzvləri məktəbin bütün kollektivinə, əməyi olan hər kəsə təşəkkür ediblər.
Tədbirdə məktəblilərin hazırladığı musiqi, şeir və rəqs kompazisiyaları təqdim olunub.
Sonda xatirə şəkli çəkdirilib.
