AVRO-2020-nin seçmə mərhələsində Azərbaycanla eyni qrupda yer alan Macarıstan millisinin kapitanı Adam Şalay nümunəvi addıma əl atıb.
Rakus.az xəbər verir ki, 32 yaşlı hücumçu xeyriyyəçilik etmək qərarına gəlib.
Macarıstan idman ictimaiyyətinin bir çox üzvü kimi, Şalay da ağır xəstəliyə düçar olan 22 aylıq körpəyə yardım etmək istəyir. Bu səbəbdən futbolçu feysbuk səhifəsi vasitəsilə seçmə mərhələdə Azərbaycana qarşı keçirilən oyunda geyindiyi formanı hərraca çıxarıb. Həmin forma satışından əldə ediləcək gəlir Hoşzu Leventenekin müalicəsi üçün ödəniləcək. Beyin atrofiyası diaqnozu qoyulan körpənin müalicəsi ən geci noyabrın əvvəlindən başlamalıdı.
Xatırladaq ki, oktyabrın 13-də keçirilən Macarıstan – Azərbaycan matçı ev sahiblərinin 1:0 hesablı qələbəsi ilə yekunlaşıb.
