Müdafiə Nazirliyi: Ermənilər təxribat törədib, xeyli sayda itki verib
Aprelin 11-də Ermənistan silahlı qüvvələrinin bölmələri tərəfindən Laçın rayonu istiqamətində törədilən təxribat nəticəsində yaranmış gərginlik davam edir.
Rakus.az xəbər verir ki, bu barədə Müdafiə Nazirliyi məlumat yayıb.
Bildirilib ki, qeyd olunan istiqamətdə yerləşən bölmələrimiz tərəfindən görülən zəruri tədbirlər nəticəsində qarşı tərəf xeyli sayda itki verib.
18:01
Ermənistan tərəfinin törətdiyi təxribat nəticəsində üç erməni əsgəri ölüb.
Bu barədə erməni mənbələri xəbər veriblər.
Bildirilir ki, çoxsaylı yaralılar da var, ancaq onların dəqiq sayı açıqlanmayıb.
Yaralılar arasında xüsusi təyinatlı ordu korpusunun komandiri Armen Gozalyanın olduğu vurğulanıb. Hazırda onun əməliyyat olunduğu bildirilir.
Xatırladaq ki, aprelin 11-i Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətində yerləşən üzbəüz mövqelərini atıcı silahlardan intensiv atəşə tutub.
Azərbaycan Müdafiə Nazirliyinin məlumatına görə, qarşı tərəfin törətdiyi təxribat nəticəsində Azərbaycan Ordusunun hərbi qulluqçuları şəhid olub və yaralanıb.
Hazırda Ordumuzun bölmələri tərəfindən adekvat cavab tədbirləri görülür.
