On bir yaşlı “Report”: Yeni nəsil jurnalistlərin ünvanı
Bu gün “Report” İnformasiya Agentliyinin (İA) fəaliyyətə başlamasından 11 il ötür. Təbii ki, ötən müddətdə qazanılan nailiyyətlər reportçuların böyük zəhməti, fədakar əməyi hesabına baş verib. Təqribən, 35 illik jurnalistika fəaliyyətimin 5 ili bu gün təkcə ölkəmizdə deyil, dünyada tanınan, beynəlxalq status qazanmış məhz bu İnformasiya Agentliyi ilə bağlıdır. “Report” haqqında danışmaq həqiqətən qürurvericidir. Çünki istər xəbərin əldə olunması, işlənilməsi, yoxlanılması və buraxılması prosesi müasir tələblərə cavab verən səviyyədə qurulub – real, aydın, kreativ, unikal və obyektiv. Təbii ki, bunlar informasiya agentliyi üçün son dərəcə vacib olan keyfiyyət göstəricisidir. “Report” həm də kollektivin idarəedilməsi, əməkdaşlara münasibət, qayğı, bir sözlə, mənəvi xüsusiyyətləri ilə seçilir və sevilir. Mehriban kollektiv, səmimi ünsiyyət bu mətbuat orqanının gündən-günə parlaması, reytinqinin artması, istehsal etdiyi xəbərlərə istinad edilməsi, beynəlxalq aləmdə ölkəmiz adına informasiya məkanını genişləndirməsi üçün yaxşı nümunədir. Dövlət və dövlətçilik prinsiplərini əsas tutmaq, hadisə və proseslərə obyektiv münasibəti ilə etibar qazanmaq, jurnalistika peşəsinə məhəbbət, eləcə də yeni nəsil jurnalistlərin yetişməsi üçün məktəb yaratmaq, gənclərin bu sahəyə marağını artırmaq üçün çalışmaq da reportçuların təməl prinsiplərindəndir.
Bu özəl gündə həmkarlarımızı yaranış günləri münasibətilə təbrik etmək, onlara yeni yaradıcılıq uğurları arzulamaq içdən gələn diləyimizdir. Qoy həmişə “Report” İnformasiya Agentliyinin rəhbərliyi və vətənpərvər kollektivi onilliklər boyu yaşasın, Azərbaycanın köklü xəbər agentliklərindən birinə çevrilsin. Çünki, bu, onlara yaraşır. Yolunuz hər zaman açıq, canınız sağlam olsun, əziz REPORTÇULAR!
Xatırladaq ki, Azərbaycanın media sektorunda mühüm rol oynayan bu agentlik son 11 il ərzində ölkədə və dünyada baş verən ən vacib hadisələri operativ şəkildə işıqlandıraraq geniş oxucu auditoriyasının rəğbətini qazanıb. 2014-cü ildə fəaliyyətə başlayan və hazırda “Global Media Group” şirkətinin tərkibinə daxil olan “Report” İA qısa müddətdə böyük uğurlara imza atıb. Belə ki, Azərbaycan, rus və ingilis dillərində fəaliyyət göstərərək, siyasət, iqtisadiyyat, cəmiyyət, idman, mədəniyyət, sosial, analitika, hərbi və digər sahələrdə ölkə və dünya gündəmini operativ şəkildə oxucularına çatdırır. Yarandığı gündən agentliyin qarşıya qoyduğu məqsəd ölkədə və dünyada baş verən ən vacib hadisələri işıqlandırmaqla yanaşı, ictimai-siyasi, iqtisadi proseslərlə bağlı analitik materiallar təqdim etmək, gündəmin vacib hadisələri ilə bağlı eksklüziv müsahibə və açıqlamalar yaymaq, Azərbaycanda baş tutan irimiqyaslı tədbirləri foto, videoreportajlar vasitəsilə işıqlandırmaqdan ibarət olub.
