Onlar sabah narkotik aludəçisi olur – Deputat
Daha əvvəl xəbər verdiyimiz kimi, Bakı Şəhər Baş Polis İdarəsi paytaxtda ictimai mənəviyyat əleyhinə və milli mentalitetə zidd olan hallara qarşı mübarizəni gücləndirir. İdarədən verilən məlumata görə, əxlaqa zidd olan bütün halların forma və təzahürlərinə qarşı mübarizənin effektivliyini artırmaq üçün milli-mənəvi dəyərlərimizə uyğun olmayan davranışların, ictimai əhəmiyyət kəsb edən digər neqativ halların qarşısının alınması üçün kompleks profilaktik tədbirlərin həyata keçirilməsi nəzərdə tutulur. Bəs görəsən polisin bu tədbirləri problemi aradan qaldırmaq üçün kifayətdirmi?
Rakus.az xəbər verir ki, Milli Məclisin deputatı Fazil Mustafaya bildirib ki, polisin məlumatında milli mentalitet ifadəsi məqbul deyil və onu qanunvericilikdəki dəqiq adı ilə ifadə etmək lazımdır: “Bu cür addımları hansısa sənəddə, yaxud bəyanatda milli mentalitetə zidd halların qarşısını almaq üçün fəaliyyət kimi göstərmək olar. Lakin qanunvericilikdə bunun dəqiq adları var. Bu adlar üzərində hər hansı bir hüquq pozuntusu, ictimai münasibətlərin pozuntusu baş verərsə, polisin ona müdaxilə etmək imkanı və hüququ mövcuddur”.
Polisin bu təşəbbüsünü dəstəklədiyini deyən F. Mustafa vurğulayıb ki, cəmiyyətdə çaşqınlığın yaranmaması üçün sadəcə orada konkret hüquqi terminlərlə məsələnin daha dəqiq izahı verilməlidir.
Onun sözlərinə görə, bu tədbirlər daha çox narkomaniya, yüngül həyat təzrinə və əxlaqsız yuvaların saxlanılmasına qarşı atılmış addımları nəzərdə tutur: “Xüsusilə yetkinlik yaşına çatmayan oğlan və qızların barlara cəlb olunması kimi problemlər var. Yaxşı olardı ki, bura qəlyanxanalarla bağlı məsələ də əlavə olunsun. Həmin obyektlərə də xeyli sayda gəncin cəlb olunması faktları vardır. Bu da birbaşa həmin gənclərin səhhətinə neqativ təsir göstərir”.
Deputat diqqətə çatdırıb ki, bu cür problemlərlə mübarizə aparanda, ilk növbədə, cəmiyyətin dəstəyini almaq lazımdır: “Çünki bu, təkcə polisin işi deyil. Cəmiyyət bütövlükdə bu məsələlərə qarşı səfərbər olmalıdır. Ən azından hər hansı yeniyetmənin bara cəlb olunduğunu görən vətəndaş özü də bu istiqamətdə təşəbbüs göstərməlidir ki, belə gənclərin sıradan çıxarılmasının qarşısı alınsın”.
Millət vəkilinin fikrincə, məktəblərin yaxınlığında yerləşən qəlyanxanaların mövcudluğu məsələsini də gündəmə gətirmək lazımdır: “Bu da ciddi məsələlərdən biridir. Çünki həmin obyektlərə cəlb olunan məktəbli sonrakı mərhələdə narkotik vasitələrin aludəçisi olur. Bunlar kompleks tədbirlər formasında cəmiyyətin də dəstəyini alaraq edilməlidir”. (E-huquq.az)
