Mətbuat 01.07.2023 11:17

Oxu.az xəbər saytı 10 illiyini qeyd edir - FOTO - VİDEO

Ölçü

A+ A- A

Bu gün onlayn mediada kifayət qədər nüfuza sahib, eyni zamanda oxucuların dərin rəğbətini qazanmış Oxu.az xəbər saytının 10 yaşı tamam olur. Biz də həmkarlarımızı təbrik etməyə, onlarla keçmiş fəaliyyətləri və gələcək planları barədə danışmağa gəlmişik.

Rakus.az xəbər verir ki, “Report” Oxu.az-ın redaksiyasından hazırladığı reportajı təqdim edir.

Redaksiyaya daxil olur və bayram tətili olmasına baxmayaraq, burada qızğın iş mühitinin şahidi oluruq. Ölkənin ən oxunaqlı saytı statusunu əlində saxlamaq üçün əsas şərtlərdən biri də yəqin ki, çox çalışmaqdır. Bu baxımdan 30 gündə 1 milyon oxunma sayı ilə Oxu.az kollektivi çətin və məsuliyyətli işinin öhdəsindən layiqincə gəlməyi bacarır desək, yanılmarıq.

Saytın Baş redaktoru Ülvi Səfərovla Oxu.az-ın gələcək planları barədə həmsöhbət oluruq: “Bu gün ölkənin ən böyük xəbər saytının 10 yaşı tamam olur. Artıq 10 ildir oxucular bizə etimad göstərir. Təbii ki, bu etimaddan doğan məsuliyyət yükü var. Oxucu kütləsini əldə saxlamaq həmin məsuliyyət yükünü bir qədər də artırır. Bu komandanın üzvü olduğumuz üçün qürurluyuq. Həqiqəti çatdırmaq, informasiyanı dolğun şəkildə və hər kəsdən öncə vermək bizim əsas məqsədlərimizdən biridir. Bundan sonra oxucu kütləmizi daha da artırmaq üçün əlimizdən gələni edəcəyik. Ona görə bundan sonra da Oxu.az-dan yenilikləri gözləməyə dəyər. Xüsusən də ad günümüzdən sonra oxucularımız kifayət qədər yenilikləri müşahidə etmək imkanı əldə edəcək”.

Oxu.az saytının redaktoru Dursun Tağıyeva isə bildirib ki, 10 il ərzində həm oxucuların inamını qazanmaq, həm də xəbərləri operativ şəkildə oxucuların diqqətinə çatdırmaq hazırkı informasiya məkanında böyük iş hesab olunur: “Biz oxucularımızda “Oxu.az hansısa bir xəbəri veribsə, deməli doğrudur” fikrini formalaşdırmağı bacarmışıq. Oxu.az-ın 10 yaşı münasibətilə saytımızın kollektivini və hər bir oxucumuzu ürəkdən təbrik edirəm”.

Redaktor Rövşən Əsədov deyib ki, bu gün informasiya məkanı olduqca zəngindir: “Vətəndaşlar informasiyanı həm xəbər portalları, həm sosial şəbəkələrdən əldə edirlər. Burada rəqabət aparmaq üçün operativ, çevik, qərəzsiz və vicdanlı olmaq lazımdır. Oxu.az bu prinsiplərin hər birinə riayət edərək işinin öhdəsindən layiqincə gəlib və 10 il ərzində oxucularını həm operativ, həm də qərəzsiz şəkildə informasiya ilə təmin edib. Keçmişdə və hazırda bu işdə əməyi olan hər kəsi Oxu.az-ın 10 yaşı münasibətilə təbrik edirəm”.

Saytın siyasət şöbəsinin xüsusi müxbiri Aqşin Kərimov qeyd edib ki, siyasətdən yazmaq olduqca məsuliyyətli və çətin işdir: “Çətinlik isə əsasən müxtəlif mənbələrlə işləmək və gündəlik emal olunan informasiyaları bir yerə toplayıb təhlil etməklə bağlıdır. Ancaq işimə olan böyük marağım bu işin öhdəsindən gəlməkdə mənim üçün əsas stimul olur. Oxu.az kifayət qədər oxunaqlı sayt olduğu üçün burada dərc olunan analiz, siyasi təhlil çox böyük maraqla qarşılanır”.

Əldə edilən mükəmməl hər bir nəticə yaxşı komanda işinin məhsuludur. Oxu.az xəbər portalı da qazandığı nailiyyətlərlə bu fikrin nə dərəcədə yerində deyildiyinin bariz nümunəsidir. Biz də “Report” İnformasiya Agentliyi olaraq bu çətin və məsuliyyətli peşənizdə hər birinizə uğurlar arzulayırıq. Hər zaman qələminiz iti, sözünüz kəsərli olsun!