Özil və “Arsenal”a şok qadağa – Adı “Google”dən sildirildi
Çin höküməti Arsenal”ın futbolçusu Məsut Özillə bağlı bəzi qadağalar tətbiq edib.
Rakus.az xəbər verir ki, buna onun Şərqi Türküstandakı insanlara edilən haqsızlıqlarla bağlı “İnstaqram” səhifəsində yazdığı fikirlər səbəb olub. Çin höküməti ölkədə axtarış sistemlərindən Özilin adını sildirib, sosial şəbəkələrdə isə alman yarımmüdafiəçiyə məxsus səhifələrin görüntülənməməsinə qərar verilib. Bundan başqa, Özilin “M10” adlı fan klubu bloklanıb. Eyni zamanda KİV-də “Arsenal”ın adının çəkilməsinə qadağa qoyulub. Bu qadağa Özilin bəyanatına görə London klubunun üzr istəməyəcəyi günə qədər davam edəcək.
Bildirilib ki, 31 yaşlı yarımmüdafiəçinin fikirlərinə görə London klubunun nümayəndələri üzr istəyənə qədər qadağalar davam edəcək.
Xatırladaq ki, “Arsenal”ın futbolçusu Məsut Özil Şərqi Türküstandakı insanlara edilən haqsızlıqlara münasibət bildirib. O, “İnstaqram” səhifəsində paylaşım edərək, müsəlman dünyasının bunlara səssiz qaldığını bildirib: “Əziyyətlərə dözən, məcburən İslamdan uzaqlaşdırmağa çalışanlara qarşı tək mübarizə aparan şanlı möminlər! Quranlar yandırılır, məscidlər bağlanır, mədrəsələrə qadağa qoyulur, din alimləri bir-bir öldürülür. Kişilər məcbur düşərgələrə göndərilir. Onların əvəzinə çinli kişilər ailələrinə yerləşdirilir. Qadınlar zorla çinli kişilərlə evləndirilir. Bütün bunlara rəğmən həzrəti Məhəmmədin yolçuları susur. Müsəlmanlar sahiblənmir. Bilmirlər ki, zülmə razılığın qarşılığı zülmdür? Həzrəti Əli nə gözəl deyib: “Zülmün qarşısını ala bilmirsinizsə, onu hər kəsə çatdırın!”. Qərb mediası və dövlətlərində bu hadisələr aylardır ki, gündəmdədir. Bəs, müsəlman ölkələri və mediaları haradadır? Bilmirlər ki, zülmün olduğu yerdə tərəfsizlik namussusluqdur? Bilmirlər ki, illər sonra oradakı qardaş və bacılarımız bu çətin günlər haqda xatırlayacaqları zalımların işgəncələri yox, biz müsəlmanların səssizliyi olacaq. Ya Rəbbim, Şərqi Türküstandakı qardaş və bacılarımıza kömək ol”. (qol.az)
