“Primakov müsabiqəsi” ciddi naraziliqla qarşılanır
Bakı Slavyan Universiteti (BSU) bu günlərdə 20 Yanvar qırğınının törədilməsində iştirak etmiş sovet və Rusiya dövlət xadimi Yevgeni Primakovun 90 illik yubileyi ilə bağlı esse müsabiqəsi keçirib. Universitetdə keçirilən bu tədbir Azərbaycan cəmiyyətində heç də yaxşı qarşılanmayıb. Müsabiqəyə xeyir-dua vermiş BSU rəhbərliyi ciddi tənqidlərə tuş gəlib. Olay günlərdir müzakirə olunur.
Rakus.az xəbər verir ki, “20 Yanvar” İctimai Birliyinin sədri Soltan Əzimzadə açıqlamasında belə bir müsabiqənin keçirilməsindən hiddətləndiklərini vurğulayıb.
““Primakov müsabiqəsi” ilə bağlı “20 Yanvar” İctimai Birliyi adından bəyanat vermişik. Eyni zamanda, bir neçə təşkilatlar var ki, onlarla da əlaqə saxladıq. Həmin qurumlar da bizimlə eyni fikirdə oldular. Bəyanatın mətnini müvafiq dövlət orqanlarına göndərdik. Hətta, YAP icra katibinin müavini Siyavuş Novruzova zəng etdim. Sualım o oldu ki, Bakı Slavyan Universitetinin rektoru Nurlana Əliyeva YAP Qadınlar Şurasının sədridir. Yeni Azərbaycan Partiyasını təmsil edən, bu cür yüksək postu tutan biri Primakova haqq qazandırırsa, o zaman YAP-ın mövqeyi nədən ibarətdir?! Siz bu qadını YAP sıralarında saxlamaq istəyirsiniz, yoxsa, istəmirsiniz?! Sadəcə olaraq vətəndaş mövqeyindən çıxış edərək suallarımı ünvanladım”.
Soltan Əzimzadə deyib ki, Nurlana Əliyevanın YAP-ın üzvlüyündən çıxarılmasına tərəfdardır və partiyaya müraciətində bunu qeyd edib.
“20 Yanvar” İctimai Birliyinin sədri vurğulayıb ki, Primakovun 90 illik yubileyinə həsr edilən esse müsabiqəsiə Qafqaz Müsəlmanları İdarəsinin (QMİ) reaksiya verəcəyi günü də səbirsizliklə gözləyiblər:
“QMİ sədri Allahşükür Paşazadə 20 Yanvar hadisələrinin törədilməsində birbaşa iştirak etmiş Yevgeni Primakovun şərəfsizliyinin şahidi olmuş adamdır. İstəklərimdən biri o idir ki, şeyximiz də buna reaksiya versin. Nəhayət ki, bu gün səhər Allahşükür Paşazadə hadisəyə münasibətini bildirib. Sağ olsun ki, milli mövqeyini ortaya qoyub.
Nəyə görəsə rəsmi olaraq dövlət səviyyəsində buna münasibət bildirilmir. Nurlana Əliyeva hələ də Bakı Slavyan Universitetində rektor olaraq çalışır”.
Bakı Slavyan Universitetinin (BSU) Beynəlxalq münasibətlər, regionşünaslıq və jurnalistika fakültəsinin tələbələri Rusiya Federasiyasının Azərbaycandakı Səfirliyinin təşəbbüsü ilə sovet və Rusiya dövlət xadimi Yevgeni Primakovun 90 illik yubileyi ilə bağlı keçirilimiş esse müsabiqəsində qalib gələrək diplomla təltif ediliblər.
Bu münasibətlə oktyabrın 15-də Rusiya Federasiyasının Azərbaycandakı fövqəladə və səlahiyyətli səfiri Mixail Boçarnikov esse müsabiqəsinin qalibi olmuş BSU tələbələri – Aygül Mirzoyeva, Ruzana Əliyeva, Sarana Bədəlova, Kəmalə Qasımova və Aliyə Mamalovaya diplom verib.
Y.Primakov 1990-cı ilin 19 yanvar gecəsində Bakıya sovet qoşunlarının yeridilməsində SSRİ müdafiə naziri Yazovla birgə iştirak edib. Faciə nəticəsində 146 nəfər öldürülüb, 744 nəfər yaralanıb, 841 nəfər qanunsuz həbs olunub
Yevgeni Primakov 1991-1996-cı illərdə Rusiyanın Xarici Kəşfiyyat Xidmətinin direktoru, daha sonra xarici işlər naziri və Baş naziri işləyib. O, Sənaye Ticarət Palatasının prezidenti postunda 2001-ci ilin dekabr ayından 2011-ci ilin fevral ayına kimi çalışıb.
