“Qərbi Azərbaycanın Şirin inciləri” kitabının təqdimatı olub - FOTO
Oktyabrın 12-də “Xanədan” etno-restoranında Azərbaycan Respublikasının Qeyri Hökumət Təşkilatlarına Dövlət Dəstəyi Agentliyinin Qrant layihəsi çərcivəsində Azərbaycan Milli Kulinariya Assosiyasiyasında hazırlanmış “Qərbi Azərbaycanın Şirin inciləri” kitabının təqdimatı olub.
Rakus.az xəbər verir ki, kitabın təqdimatı “20 oktyabr Dünya Kulinariya günü” bayramına həsr edilib. Tahir Əmiraslanov və Aynurə Əmiraslanova tərəfindən yazılmış “Qərbi Azərbaycanın Şirin İnciləri” adlı bu kitab Qərbi Azərbaycan ərazisində yüzilliklər boyu formalaşan və ermənilər tərəfindən özününküləşdirilən ənənəvi şirniyyatların disturların bərpasını və tarixi-etnoqrafik tədqiqatını əhatə edir.
Kitabın ön sözü Azərbaycan Respublikasının Qeyri Hökumət Təşkilatlarına Dövlət Dəstəyi Agentliyinin icraçı direktoru Aygün Əliyevadır.
A.Əliyeva tədbirdə çıxış edərək kitabın elmi, praktiki, mədəni mahiyyəti ilə yanaşı , siyasi mahiyyətini də açıqlayıb, görülmüş işi yüksək dəyərləndirib.
Qərbi Azərbaycanın İcması, AMEA, mətbuat nümayəndələri, sponsorlar, içtimai birliklərin sədrləri fikirlərini böğlüşüblər.
Tədbirdə qonaqlara kitab paylanılıb.
Xatırladaq ki, kitab iki dildə – Azərbaycan və İngilis dillərində təqdim olunur və 220 səhifədən ibarətdir. Kitabda Qərbi Azərbaycan mətbəxinə aid bərpa edilmiş ənənəvi şirniyyat düsturları ilk dəfə geniş şəkildə təqdim olunur. Sucuq, alana, İrəvan kətəsi, saray paxlavası, adi paxlava, xurma südü, göyçə badamburası, cilov kimi şirniyyatlar bu mətbəxin inciləri olaraq ilk dəfə oxuculara nəfis şəkildə təqdim edilib. Üz qabığında isə ermənilərin özününküləşdirməyə çalışdığı bu şirniyyatların rəsmləri yer alır. Kitabın son üz qabığında isə “Kəvər” adlı toponimdən götürülmüş paxlavanın təsviri əks olunub. Kitabda geniş mövzulara toxunulub: unlu və qənnadı məmulatlarından başlayaraq, meyvə quruları, mürəbbələr, şəkərləmələr və içkilərə qədər müxtəlif şirniyyatlar ətraflı şəkildə təsvir olunub. Həmçinin, kitabın sonunda 58 ədəd ədəbiyyat siyahısı və bu sahə ilə bağlı məlumatlar verən 63 respondent haqqında məlumat yer alır. Kitab həm tədqiqatçılar, həm də milli mətbəximizi öyrənmək istəyən kulinariya həvəskarları üçün əvəzsiz bir qaynaqdır. Kitab AMEA-nın Gəncə Bölməsinin Rəyasət Heyətinin qərarı ilə “Nero” nəşriyyatında çap olunub. Kitabın sonunda müəlliflər və əsas mənbələr haqqında məlumat və digər faydalı bilgilər yer alıb.
