Qış Olimpiya Oyunlarında tibbi xidmət yüksək olacaq
Çinin paytaxtı Pekində 2022-ci ildə keçiriləcək Qış Olimpiya Oyunlarının iştirakçılarına yüksək keyfiyyətli tibbi xidmət göstəriləcək.
Rakus.az xəbər verir ki, Pekinin şəhərətrafı ərazisində Oyunlar üçün inşa edilən tibb mərkəzində bütün işlər bu ilin sonunadək başa çatdırıla bilər. Belə ki, Pekin Universiteti xəstəxanasının binası və tibb hissəsinin yenidən qurulması artıq başa çatıb. Fasad işlərinin təxminən 95 faizi tamamlanıb. Mərkəzdə ən yüksək beynəlxalq tibbi standartlara cavab verən müasir avadanlıq da mövcuddur. Xəstəxanada rahat palatalar, əməliyyat otaqları və 18 şöbə var.
Olimpiya Oyunlarından sonra klinikanın bazasında qış idman növlərində zədələrin qarşısının alınması, idmançılar üçün ilk yardım, diaqnoz və reabilitasiya ilə bağlı araşdırmalar aparılacağı gözlənilir.
Xatırladaq ki, Qış Olimpiya Oyunlarının Pekində 2022-ci il fevralın 4-dən 20-dək keçirilməsi planlaşdırılır.
