Ramin Bayramlının çıxışından SİTATLAR
Nazirlər Kabineti yanında Operativ Qərargahda mətbuat konfransı keçirilib.
Rakus.az xəbər verir ki, mətbuat konfransında Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı mühüm məlumatlar verib.
Onun çıxışından lazım olan sitatları təqdim edirik.
Tibbi maskalardan istifadənin məcburiliyi
Azərbaycanda tibbi maskalardan istifadənin məcburi olması ilə bağlı müraciət etmişik. Bir sıra müəssisələrdə və qapalı sahələrdə maskalardan istifadə məcburi olacaq. Onun icra məcburiyyətinin necə yerinə yetirilməsi digər dövlət qurumlarının səlahiyyətində olan məsələdir.
Tibb işçiləri kütləvi şəkildə koronavirusa yoluxub
Azərbaycanda koronavirusa yoluxan tibb işçilərinin 90 faizi sağalaraq evə yola salınıb. Son günlərdə tibb işçiləri arasında yoluxma tendensiyası və artım müşahidə edilmir. Tibb işçilərinin onlara təqdim edilən qaydalara riayət etməsi və fərdi qoruyucu vasitələrdən istifadə etməsi nəticəsində yoluxma sayı azalıb. Gəncə şəhərində kütləvi şəkildə tibb işçilərinin koronavirusa yoluxması barədə yayılan məlumatlar yalandır. Gəncədə dezinfeksiya stansiyasının işçiləri arasında yoluxma olub və rəqəm o qədər də böyük deyildi.
Koronavirus dövründə hərbi xidmətdə olanlarla bağlı
Əsgər yaxınlarının onların yanına getməsinə icazə yoxdur. Hərbi hissələrdə xidmətini başa vuranların evə qayıtması xüsusi qaydalarla tənzimlənəcək. Bu istiqamətdə qaydalar hazırlanıb və ölkə rəhbərliyinə, müvafiq qurumlara təqdim olunub. Ümumi razılığa əsasən, qaydalar tətbiq ediləcək. Bu qaydalar tətbiq edilməzsə, hərbi hissələr və qapalı cəzaçəkmə müəssisələrini qoruya bilmərik.
Azərbaycanda bu zonalarda koronavirus daha təhlükəli həddədir
Bakı, Sumqayıt, Gəncə və Lənkəran şəhərləri narıncı zonadır. Naxçıvan Muxtar Respublikası və digər şəhər və rayonlarda epidemioloji vəziyyət sabitdir. O ərazilər sarı zolaqla qeyd edilib. Yaşıl rənglə işarələnmə koronavirusa yoluxma olmayan və karantin rejimi məhdudiyyətlərinin aradan qaldırılmasından sonra qeyd olunacaq. Aktiv yoluxma halları 50-dən az olduqda sarı, çox olduqda isə narıncı zolaqla qeyd olunur. Aktiv yoluxma halları 100-dən çox olduqda – Bakı şəhərində bu hal 500-dən yuxarı olarsa – qırmızı rənglə qeyd olunacaq və həmin ərazidə karantin rejimi sərt şəkildə tətbiq ediləcək. Hazırda ölkəmizdə sarı və narıncı rənglərə uyğun epidemioloji vəziyyət mövcuddur.
İctimai yerlərdə qoruyucu vasitələrdən istifadə məcburi olacaq
İndiyə kimi 11 minə yaxın vətəndaşımız hava nəqliyyatı ilə ölkəmizə gətirilib. “Evə gedirəm” portalı vasitəsilə 205 vətəndaşı qəbul edəcəyik. Onlar 14 gün xüsusi rejimli xəstəxanalarda qalacaqlar. Xəstəliyin peyvəndinin tapılması yaxın gələcəkdə real görünmür. Bir müddət ictimai yerlərdə qoruyucu vasitələrdən istifadə məcburi olacaq.
Bu halda karantin rejimi yenidən sərtləşdiriləcək
50-59 yaş arasında yoluxma 22 faiz, 0-9 yaş arası yoluxma 5 faiz, 80 yaşdan yuxarı yoluxma isə 2 faizdir. Vəfat edənlər arasında 60-69 yaşlılar üstünlük təşkil edir. 11 nəfərdə bu hal müşahidə olunub. Onlarda əsasən, yanaşı gedən xəstəliklər olub. Məhdudiyyətlərə əməl edilməsə, karantin rejimi sərtləşdiriləcək.
Bu ərazilərdə koronavirusa yoluxma artıb
Hazırda ən çox aktiv yoluxma halları Gəncə və Lənkəranda qeydə alınıb. Bakının Yasamal, Nəsimi və Binəqədi rayonlarında koronavirusa yoluxma halları üstünlük təşkil edir. Bakı şəhərində koronavirusa yoluxma 50 faizdən yuxarıdır. Sumqayıt şəhərində isə virusa yoluxma 3,2 faizdir. Burada da əhalinin sıxlığı önəmlidir.
Gəncə və Lənkəran şəhərlərində də yoluxma halları üstünlük təşkil edir. Həmçinin, qeyd etmək lazımdır ki, qadınlar arasında yoluxma yenə də üstünlüyünü qoruyur.
Koronavirus testləri ilə bağlı
İndiyə qədər Azərbaycanda 150 minə yaxın koronavirus testi icra olunub Azərbaycanda 1326 xəstə koronavirusdan sağalıb. 92 yaşlı nənə Mərkəzi Neftçilər Xəstəxanasında müalicə olunaraq evə göndərilib. Türkiyədən gələn həkimlər Bakıda missiyalarını bitiriblər. Onlar Gəncə, Goranboy, Şəmkir və Ağdaş rayonlarına gedəcəklər.
