“Şərq tərəfdaşlığı” proqramının 10 illik fəaliyyətinə yekun vuruldu
Polşa Respublikasının Azərbaycan Respublikasındakı səfirliyində “Şərq tərəfdaşlığı” proqramının 10 illik fəaliyyətinə yekun vurulub.
Rakus.az xəbər verir ki, Polşanın Azərbaycandakı müvəqqəti işlər vəkili Mixal Qreçilo tədbirdə çıxış edib.
O xatırladıb ki, belə bir tərəfdaşlıq yaradılması təşəbbüsünü Polşa və İsveç irəli sürüb.
M.Qreçilo deyib: “Biz Şərq qonşularımız Ukrayna, Belarus, Azərbaycan, Gürcüstan və Ermənistanla tərəfdaşlıq ideyasını irəli sürməklə xüsusi qonşuluq siyasəti yaratmaq istəmişik. Bu təşəbbüsün əsas məqsədi “Şərq tərəfdaşlığı”nın iştirakçısı olan ölkələrdə siyasi və sosial-iqtisadi islahatlara kömək etmək yolu ilə Avropa İttifaqı və tərəfdaş ölkələr arasında siyasi və iqtisadi inteqrasiyanın sürətləndirilməsi üçün zəruri şərait yaratmaq idi”.
Təqdimat mərasimində “Şərq tərəfdaşlığı” proqramının 10 illik fəaliyyətini əks etdirən videoçarx nümayiş etdirilib.
Polşalı diplomat “Şərq tərəfdaşlığı”nın gələcək fəaliyyətinin prioritetləri barədə öz ölkəsinin mövqeyini şərh edib. O, üç prioriteti qeyd edib: iştirakçı ölkələrin qanunvericiliklərinin Aİ qanunvericiliyinə yaxınlaşdırılması, bütün sahələrdə əməkdaşlığın genişlənməsi və inteqrasiyanın daha da dərinləşməsi.
Avropa İttifaqının Azərbaycandakı nümayəndəliyinin rəhbəri Kestutis Yankauskas “Şərq tərəfdaşlığı”nın 10 illik tarixi barədə söhbət açaraq bildirib ki, bu proqramın əsas vəzifəsi təhlükəsizlik strategiyasıdır. Səfir deyib: “Əgər qonşularımızın problemləri varsa, bu halda Avropa İttifaqı rahat inkişaf edə bilməz. “Şərq tərəfdaşlığı” Avropa İttifaqının əsas diqqətini mövcud problemlər üzərində cəmləşdirməsinə və onların həllində iştirak etməsinə imkan yaradıb. “Şərq tərəfdaşlığı” ölkələri Aİ ölkələri ilə ticarətin həcminə görə məcmu halda onuncu yeri tutur. On il ərzində Azərbaycan ilə Aİ arasında əmtəə dövriyyəsi 28 faiz artıb. “Şərq tərəfdaşlığı” çərçivəsində Aİ ilə Azərbaycan arasında iki saziş imzalanıb – readmissiya haqqında və viza konsolidasiyası haqqında. Bu sənədlər sayəsində 2015-2018-ci illərdə Azərbaycan vətəndaşlarına verilən vizaların 40 faizi təkrar istifadə üçün nəzərdə tutulub. 2017-2018-ci illərdə 25 min viza pulsuz verilib”.
