Şuşanın tarixinə laqeydlik edilir – deputat
Milli Məclisin deputatı Aqil Abbas parlamentin bu gün keçirilən plenar iclasında Şuşanın yaranmasının 270 illiyi ilə bağlı tədbir keçirilməsi təklif edib.
Rakus.az xəbər verir ki, o, Qarabağ xanlığının və Şuşanın tarixinə laqeydlik edildiyini söyləyib.
Deputat bildirib ki, bu il Şuşanın yaranmasının 270 illiyi tamam olur: “Bu məsələ gündəmə gəlməlidir. Tariximizə qarşı bu qədər laqeydlik olmaz. Mən burada əyləşən deputat həmkarlarımı da bu məsələdə aktivlik göstərməyə çağırıram. Xahiş edirəm xanım Sədr siz də bu məsələni qaldırasınız”.
Regional məsələlər komitəsinin sədri Siyavuş Novruzov isə deyib ki, vaxtilə Surət Hüseynovun əsiri olan şəxslər indi qəhrəman kimi təqdim olunurlar.
Onun sözlərinə görə, o zaman hadisələrin qarşısını ala bilməyən AXC-Müsavat cütlüyü indi özlərini demokrat adlandırırlar: “O zaman Sürət Hüseynov dar ağacları qurmuşdu ki, Əli Kərimlini, İsa Qəmbəri assın. Onları ümummilli lider Heydər Əliyev dar ağacından xilas etdi. O zaman dövlət katibi olan Əli Kərimli iki il qaçıb Kələkidə gizlənmişdi, Heydər Əliyev demokratik dövlət qurandan sonra hərəsi bir dərədən çıxıb özlərini demokrat adlandırdılar”.
