“Traktor azarkeşləri FİFA-ya etiraz kampaniyasına başladılar
İran türkləri arasında populyar futbol komandası olan “Traktor” və Tehranın “Persepolis” komandası arasında keçirilən matçda “Persepolis” azarkeşləri tərəfindən səsləndirilən şüarlara etiraz bildirmək hədəfi ilə “Twitter” sosial şəbəkəsində kampaniya başladılıb.
Rakus.az xəbər verir ki, Tehranın Azadi stadionunda yanvarın 26-da “Traktor”-“Persepolis” matçında “Persepolis” azarkeşləri tərəfindən türklərə qarşı səsləndirilən şüarlar “Traktor” klubunun sahibi Məhəmmədrza Zunuzinin də reaksiya göstərməsinə səbəb olub.
Zunuzi bir müsahibədə FİFA qanunlarına görə etniklərə qarşı təhqiramiz şüarların səsləndirildiyi matçlarda hakimin oyunu durdurması gərəkdiyini və bu qanuna görə Tehrandakı matçın hakim tərəfindən dayandırılmalı olduğunu bildirib. O həmçinin İran Futbol federasiyasının bu matç ilə bağlı bir qərar vərmədiyi təqdirdə FİFA-ya şikayət edəcəyini bildirib.
“Twitter”də başladılan “Səsimizi Eşit FİFA” #fifa_hear_our_voice kampaniyasının açılış bəyanatında deyilir: “Traktor” Azərbaycan ilə “Persepolis” futbol komandalarının son matçında “Persepolis” azarkeşlərinin “Eşşək, Eşşək” səsləndirməklə milyonlarca türkü aşağılaması ilə bağlı FIFA və AFC kimi beynəlxalq futbol təşkilatlarına etirazımızı bildirmək qərarına gəldik.”
“Biz İran Türkləri İran stadionlarında irqçi hərəkətlərə və şüarlara son qoyulmasını tələb edirik”, – kampaniyaya qatılan şəxslər AFC və FİFA-nın “Twitter” səhifələrini tag edərək paylaşımlar ediblər.
