“Ulu Göyçə”nin direktoru Belarusun Fəxri ordeni ilə təltif olun du
Belarus Respublikası Prezidentinin fərmanı ilə “Ulu Göyçə” tikinti-investisiya şirkətinin direktoru Vasif İsmayılov bu ölkənin Fəxri ordeni ilə təltif edilib.
Rakus.az xəbər verir ki, Belarus Respublikasının Bakıdakı səfirliyindən verilən məlumata görə, azərbaycanlı biznesmen bu yüksək dövlət mükafatına Belarus ilə Azərbaycan arasında ticari-iqtisadi əlaqələrin və investisiya əməkdaşlığının inkişafına sanballı şəxsi töhfəsinə görə layiq görülüb.
Vasif İsmayılov ofis-işgüzar, ticarət-əyləncə və çoxfunksiyalı mərkəzlərin yaradılması, mənzil tikintisi sahəsində böyük investor və uğurlu biznesmen kimi tanınıb. 2019-cu ilin mayında ona “Mogilyovşinada ilin adamı” fəxri adı verilib, elə həmin ilin iyulunda o, illik “İş adamı” müsabiqəsinin “Belarus bazarında xarici markanın yüksək standartının dəstəklənməsinə görə” nominasiyasında laureatı olub.
O, Minskdə, Mayakovski və Aranski küçələrinin kəsişməsində inşa edilmiş, Azərbaycan Ticarət Evinin yerləşdiyi çoxfunksiyalı kompleksin – “Abşeron” biznes mərkəzinin, habelə Mogilyov şəhərində çoxfunksiyalı kompleksin və s. investorlarından biridir. 2013-cü ildə onun başçılıq etdiyi şirkət Belarusun Azərbaycandakı səfirliyinin binasını inşa edib.
