“US Open”in tələblərini yerinə yetirmək istəmirlər
Tennis həvəskarları “US Open”i səbirsizliklə gözləsə də, raketka ustaları bu turnirdə oynamağa hazır deyillər. Təşkilatçılar onların qarşısına olduqca kəskin tələblər qoyublar.
Rakus.az xəbər verir ki, yaxın günlərdə ABŞ tennis üzrə açıq çempionatının tarixi elan ediləcək. Bu barədə nüfuzlu “Forbes” nəşri məlumat yayıb. Bunun üçün ATP və WTA rəhbərliyi mövsümün bərpası ilə bağlı planı açıqlamalıdır. Ehtimallara əsasən, “US Open” avqustun 31-də başlanmalı və əvvəlki kimi Nyu-Yorkda keçirilməlidir.
Təşkilatçıların turniri keçirmək istəyi müqabilində tennisçilərin əksəriyyəti yarışda iştirak etməyin əleyhinədir. ABŞ Tennis Assosiasiyası iştirakçılar qarşısında sərt tələblər qoyub. Tennisçilərin fikrincə, qoyulan məhdudiyyətlər onların normal çıxış etməsinə mane olacaq. ABŞ jurnalisti Denni Muçenin sözlərinə görə, ATP tennisçilərinin 70 faizi bu şərtlər üzrə mübarizə aparmağa hazır deyil. Hətta dünya tennisinin liderləri Novak Cokoviç və Rafael Nadal da belə şərtlər altında “US Open”də iştirak etməyin mənasız olduğunu söyləmişdi.
“Forbes” nəşri turnirə jurnalistlərin buraxılmayacağını da yazıb. Amma hələ ki, təşkilat komitəsi bu məlumatı təsdiqləməyib.
