“Uşaq pulu”na görə Fazil Mustafa həmkarını qınadı
Milli Məclisin deputatı Hadı Rəcəbli yenidən “uşaq pulu”na qarşı çıxan açıqlaması ilə gündəmə gəlib.
Yerli kanallardan birində qonaq olan deputat “uşaq pulu” məsələsinə toxunaraq, bu məsələdə Sovet dövrünü yada salıb və Cindəki təcrübəni nümunə çəkib.
Onun sözlərinə görə, Çində “uşaq pulu” məfhumu yoxdur və çoxuşaqlı, hətta ikiuşaqlı ailələrdən vergi tutulduğunu xatırladıb. Eyni zamanda Azərbaycanı Çinlə müqayisə edərək, həmin sosial müavinətin ölkəmizdə tətbiqinə qarşı çıxıb.
Rakus.az xəbər verir ki, millət vəkili Fazil Mustafa Azərbaycanın həmkarının ölkəmizi Çinlə müqayisəsini düzgün hesab etməyib: “Biz eyni zamanda müharibə aparan ölkəyik. Azərbaycanda əhali sayı yetərli deyil. Əhali sayının artımında maraqlı olmalıyıq. Ona görə də uşaqların stimullaşdırılması vacibdir. Ailələrin çoxuşaqlı olması ölkə üçün strateji əhəmiyyət daşıyır. Bunu heç bir bəhanə ilə geriyə ata bilmərik. Bilmirəm, hər halda Hadı müəllimin hansısa bir əsaslanması var. Hər halda öz fikridir. Bunu şərh etməyi doğru saymıram. Amma fikrimcə, əksinə, ailələri stimullaşdırmalıyıq, sayı artırmalıyıq, “uşaq pulu”nu da verməliyik ki, ailələr çoxuşaqlı olsunlar. Artım çox olsun ki, gələcəkdə problemlərimiz daha çox olacaq”.
