Vergilər Nazirliyinin əməkdaşları Almaniyada səfərdə oldular
Vergilər Nazirliyinin Vergi siyasəti Baş İdarəsi və Tədris Mərkəzinin əməkdaşları Kil Universitetinin dəvəti ilə Almaniyada səfərdə olublar.
Rakus.az xəbər verir ki, Nazirliyin Media və Kommunikasiya İdarəsindən bildirilib ki, Vergitutma Bazasının Aşınmasına və Mənfəətin Vergitutmadan Yayındırılmasına qarşı mübarizə (BEPS) layihəsi ilə bağlı məsələlərə həsr olunmuş tədbirdə nazirliyin idarə rəisi Oqtay Yaqubov, Tədris Mərkəzinin rəis müavini Mirəli Kazımov və mərkəzin Vergi qanunvericiliyinin tədrisi şöbəsinin rəisi Malik Əkbərov ölkəmizin vergi sistemi, eləcə də Tədris Mərkəzinin iş prinsipləri barədə təqdimatlarla çıxış ediblər.
Səfər zamanı Vergilər Nazirliyinin Tədris Mərkəzi ilə Kil Universiteti arasında ikitərəfli münasibətlərin qurulması, birgə tədbirlərin keçirilməsi, Tədris Mərkəzinin əməkdaşlarının Kil Universitetində təcrübəyə cəlb olunması kimi qarşılıqlı maraq doğuran məsələlər müzakirə olunub.
