XƏBƏRDARLIQ: Sürücülərə müraciət edildi
Daxili İşlər Nazirliyinin Baş Dövlət Yol Polisi İdarəsi hava şəraiti ilə əlaqədar sürücülərə və piyadalara müraciət edib.
Rakus.az xəbər verir ki, DYP-dən verilən məlumata görə, respublikanın əksər bölgələrində hava şəraitinin yağmurlu keçməsi ilə əlaqədar sutkanın qaranlıq vaxtında hərəkət istiqamətində görmə şəraitinin məhdudlaşmasını nəzərə alaraq, Baş DYP İdarəsi sürücülərə son dərəcə diqqətli və ehtiyatlı olmağı tövsiyə edir.
Qurumdan qeyd edilib ki, sürücülərin zərurət olmadan ötmə əməliyyatı aparmamağı, qəfil manevrlər etməməyi, sürət həddini müəyyən edilmiş maksimum hədlərə görə deyil, yol və meteoroloji şəraitə uyğun seçmələri, piyadalara isə asfalt örtüyünün yaş olması səbəbindən yolu keçərkən yaxınlaşmaqda olan avtomobillərin qısa məsafədə dayana bilməyəcəyini nəzərə alıb, yolu yalnız onlar üçün müəyyən edilmiş yerlərdən keçmələri, habelə yolun nəqliyyat vasitələrinin hərəkəti üçün nəzərdə tutulmuş hissəsi ilə piyada getməmələri tövsiyə edilir.
