Yarımfinal oyunları keçirilib, “Göyçə” və “Novoivanovka” finala vəsiqə qazanıb
Beləliklə, tabloda hesab dəyişməyib. Sonra penaltilər seriyası başlayıb. “Ardanış”dan Azər Hüseynov, Taleh Muradov, Emin Qasımov, Emin Ələsgərov 11 metrlik zərbələri dəqiq yerinə yetirib. Ramiz Hüseynov isə qapıçının aldatsa da topu qapının yan dirənə vurub.
“Novoivanovka”da isə Vasif Əliyev, Ayxan Abbasov, Emin Imaməliyev, Qasım Məmmədov və Rafiq Həsənov penaltiləri dəqiq və ustalıqla qola çeviriblər. Nəticədə 5:4 hesablı qələbə qazanan “Novoivanovka” adını finala yazdırıb.
Bu görüşdən sonra B qrupunun birincisi “Ada Təpə” A qrupunun ikincisi “Göyçə” ilə qarşılaşıb. Bu matçın da əsas və əlavə vaxtı 2:2 hesabı ilə yekunlaşıb. Gərgin mübarizə, müxtəlif epizodlar və qarşılıqlı hücumlarla zəngin olan bu oyunda penaltilər seriyası daha da yadda qalıb. Belə ki, hər komanda hərəyə 12 on bir metrlik zərimə zərbəsi yerinə yetirib.
“Ada Təpə”də Zaur Hüseynov, Natiq Vəliyev, Şükür Məmmədalıyev, İsa İsayev, Araz Qurbanov, Heydər Xudiyev, Bayram Süleymanov, Aqil Qurbanov, İsrail İsmayılov, Etibar Alıyev, Hüseyn Kərimli topu qapıdan keçirsələr də, Toğrul Süleymanov bu imkanı qaçırıb.
“Göyçədə isə İlkin Ağayev, Məcnun Məmmədov, Əfqan Əliyev, Şirazi Rüstəmoğlu, Mikayıl Səfərov, Səhman Xasıyev, Xəqani Mazanov, Ramin Şahmaroğlu, Samir Həsənov, Nəriman Həsənov, Cavanşir Nəsirli, Xamis Hacıyev penaltini dəqiq icra ediblər. Bununla da 12:11 hesabı ilə rəqibindən üstün olan “Göyçə” adını finala yazdırıb.
Noyabrın 6-da final qarşılaşmasında “Novoivanovka” və “Göyçə”, üçüncü yer uğrunda görüşdə isə “Ardanış” “Ada Təpə” ilə üz-üzə gələcək.
Oyunlardan sonra mükafatlandırma və bağlanış mərasimi keçiriləcək.
Turnirin məqsədi Birinci və İkinci Qarabağ savaşında canlarını fəda etmiş mərd mübarizlərin xatirəsini anmaq, 44 günlük Vətən müharibəsi iştirakçılarının qəhrəmanlıq nümunələrini yaşatmaq, Məhərrəm və Siracın timsalında şəhid olan igidlərin öz peşələrindən əlavə, idmana olan marağını gənclərə aşılamaq, yeni nəslin sağlam ruhda vətənpərvər böyüməsinə töhfə verməkdir.
Xatirə turnirində qalib komandalara, eləcə də “ən yaxşı futbolçu”, “ən çox qol vuran”, “ən yaxşı qapıçı”, “ən gənc oyunçu” və “veteran oyunçu” nominasiyaları üçün mükafat, kubok, medal və hədiyyələr nəzərdə tutulub.
İştirakçılar arasında 44 günlük Vətən müharibəsi zamanı ön cəbhələrdən şəhid həmkarları kimi operativ xəbərlər, reportajlar hazırlayan jurnalistlər də var. Şəhid jurnalist Məhərrəm İbrahimovun qardaşı Əsgər İbrahimov “Ardanış”, Sirac Abışovun qardaşı Şirzad Abışov isə “Media” komandasında çıxış edir.
“Sultan keramik” və “Bee Tours”un sponsorluğu, “Mister Tum”un tərəfdaşlığı ilə keçiriləcək Ənənəvi Xatirə Turnirinə informasiya dəstəyini “Report” İnformasiya Agentliyi və Rakurs.az saytı verir.
Xatırladaq ki, işğaldan azad olunmuş ərazilərin, Ermənistan silahlı qüvvələri tərəfindən dağıdılmış yaşayış məntəqələrinin çəkilişini həyata keçirən jurnalistləri aparan nəqliyyat vasitəsi 2021-ci il iyunun 4-də Kəlbəcər rayonunun Susuzluq kəndi ərazisində tank əleyhinə minaya düşüb. Nəticədə Azərtac İnformasiya Agentliyinin əməkdaşı 1982-ci il təvəllüdlü Məhərrəm İbrahimov (Əlioğlu), Azərbaycan Televiziyasının operatoru 1989-cu il təvəllüdlü Sirac Abışov və Kəlbəcər Rayon İcra Hakimiyyəti başçısının Susuzluq kənd inzibati dairəsi üzrə nümayəndəsinin müavini Əliyev Arif Ağalar oğlu xidməti vəzifələrini yerinə yetirərkən həlak olub, dörd nəfər yaralanıb.
Prezident İlham Əliyev iyunun 14-də işğaldan azad olunan ərazilərdə vəzifə borcunu yerinə yetirmiş Abışov Sirac Abış oğlu, Əliyev Arif Ağalar oğlu və İbrahimov Məhərrəm Əli oğlunu “3-cü dərəcəli “Vətənə xidmətə görə” ordeni ilə təltif edib.
