Zal nəzarətçisi sertifikatı üçün 843 nəfər müraciət etdi
Dövlət İmtahan Mərkəzi tərəfindən keçirilən imtahanların model, texnologiya və məzmun baxımından müxtəlifliyi zal nəzarətçilərinin fəaliyyətinin təkmilləşdirilməsini, peşəkarlıq səviyyəsinin yüksəldilməsini və ictimaiyyətin daha geniş hissəsinin imtahan prosesinə zal nəzarətçisi və imtahan rəhbəri qismində cəlb edilməsini tələb edir. Odur ki, 2018-2019-cu ildən başlayaraq zal nəzarətçisi fəaliyyətinin sertifikatlaşdırılması qaydaları hazırlanmış və proses həyata keçirilib.
Rakus.az xəbər verir ki, DİM-dən verilən məlumata görə, bu ilin aprelin 26-dan etibarən sertifikatlı nəzarətçilər imtahanlarda iştirak etməyə başlayıb. Hazırda zal nəzarətçiləri bazasında 557 sertifikatlı nəzarətçi mövcuddur. 2019-cu ilin 5 avqust tarixindən etibarən proses təkrar başlayıb. Zal nəzarətçisi sertifikatı almaq üçün 843 nəfər müraciət edib.
