Zaur Əliyev COVID-19 ilə bağlı mətləbləri açıqladı - VİDEO
“Koronavirusa yoluxanların 10 faizi xaricdən gələn vətəndaşlardır”.
Rakus.az xəbər verir ki, bunu Nazirlər Kabineti yanında operativ qərargahın keçirdiyi mətbuat konfransında İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev bildirib.
Sədr qeyd edib ki, ilk dövrlərdə xaricdən gələnlər üstünlük təşkil edirdi: “Daha sonra daxildə yoluxma nəticəsində rəqəmlər artdı”.
“Təəssüf ki, koronavirus pandemiyası Azərbaycanda icbari tibbi sığortanın tətbiqinə mane oldu”.
Onun sözlərinə görə, yanvar ayında ölkənin şimal bölgəsində 20 rayonda tam, üç rayonda isə pilot layihə şəklində icbari tibbi sığortanın tətbiqinə başlanılıb: “Layihə uğurla başlamışdı, gündəlik xəstəxanalara müraciət 1000-i keçmişdi. İcbari tibbi sığortanın tətbiqi kifayət qədər ağır prosesdir. İcbari sığortanın tətbiqinə başlanılan rayonlarda proses davam edəcək. Amma digər rayonlar üçün bu proses 2021-ci il 1 yanvaradək təxirə salınıb”.
COVID-19-a görə maaşlarına əlavə artımlar alan tibb işçilərinin sayı açıqlandı
Zaur Əliyev deyib ki, tibb işçilərinin əməkhaqlarına edilən əlavələr düzgün qiymətləndirilmir. Nazirlər Kabinetinin qərarında qeyd edilib ki, əməkhaqları işlədiyi günlərə mütənasib şəkildə əlavə olunur. Bəzi tibb müəssisələrinin rəhbərliyi və ya işçilər bunu düzgün qiymətləndirməyib. Nəticədə, burada müəyyən anlaşılmazlıq yaranıb.
O əlavə edib ki, mart ayında 9483 tibb işçisinin, 1143 qeyri-tibb işçisinin əlavəsi ödənilib: “Altı milyon manatdan çox vəsait verilib. Bu, proses tam yekunlaşmayıb. Tibb müəssisələrindən siyahılar daxil olur, müəyyən dəqiqləşmələr aparılır. Əgər hər hansı tibb işçisinin şikayəti varsa və ya əlavəsini almayıbsa, bizə müraciət etsin, məsələ araşdırıldıqdan sonra əlavəsini alsın”.
Gəncədə koronavirusa kütləvi yoluxmanın səbəbi açıqlandı
“Cənub zonasında yoluxmanın əsas səbəbi orada yaşayan vətəndaşlarımızın İrana intensiv səfərləri ilə bağlıdır”, – Zaur Əliyev bildirib.
Onun sözlərinə görə, sərhədlər bağlandıqdan sonra daxildə yoluxma artıb: “Orada əks-epidemik tədbirlər görülür. Gəncəyə də başqa yerlərdən, xarici ölkələrdən giriş-çıxış kifayət qədər çoxdur. Gəncəyə ilk yoluxma idxalla gəlib və daha sonra daxildə yoluxma başlayıb”.
Sədr bildirib ki, bu günə qədər koronavirusa yoluxan uşaqlarda ağırlaşma olmayıb: “Onlarda iki dəfə test nəticəsi mənfi olduqdan sonra evə buraxılıb”.
