104 yaşlı AZƏRTAC – kövrələrək yazdığım duyğusal xatirə
Bu gün həyatımın 18 ilini (1992-2010) agentliyin mərtəbələrində keçirdiyim, ürəklə çalışdığım, 1990-cı illərin əvvəllərindəki gərginlikləri, çətinlikləri görərək və dözərək fəaliyyət göstərdiyim AZƏRTAC-ın 104 yaşı tamam olur. Əlbəttə, bu tarixdən qürurlanmaq, şərəflənmək vacibdir və məndə fərəhlənirəm. Çünki ölkəmizi dünya səviyyəsində tanıdan, mətbuat sektorunda intibah yaradan, dünya dövlətləri içərisində mötəbər agentlik statusu olan AZƏRTAC Cümhuriyyətimizin bizə yadigar qoyduğu, Ulu Öndər, böyük sevgi ilə qəlbimizdə yaşatdığımız dahi şəxsiyyət Heydər Əliyevin, eləcə də Sərkərdə statusu qazanan Prezident İlham Əliyevin hər zaman diqqət və qayğısının əhatəsində olan bir İnformasiya Agentliyindən söhbət gedir. Pessimizmə qapılıb çox da tənqidi fikirlər söyləmək istəmirəm. Amma keçmiş olduğu üçün ad çəkmək istəmədən məyus və təəssüflə xatırlatmaq istədiyim bir neçə məqam var.
Birdən yadıma düşdü ki, mən artıq 14 ildir vaxtilə mənəviyyatsız “çubuşların”, ancaq öz mənafeyini güdən, var-dövlət toplayan, agentlik içində özü üçün “hərəmxana” düzəldən, eyş-işrət üçün dövlətin vəsaitini xərcləyib min hoqqadan çıxan, at oynadan dırnaqarası rəhbərlərin haqsızlığına uğradığım AZƏRTAC-sız yaşayıram. Yəni bütün gəncliyini qurban vermiş, gecə-gündüz ürəklə çalışmış, işi hər şeydən üstün tutub dövlətə, dövlətçiliyə xidmət edən, ölkə rəhbərinə əbədi sadiq olan və ən önəmlisi bir dəfədə olsun həm davranışı, həm də fəaliyyəti ilə səhvə yol verməyən Əsgər İbrahimov qanunsuz şəkildə primitiv üsullarla işdən çıxarılıb. Səbəb isə sonralar bildiyim, heç özümün belə ummadığım, xəyalımdan belə keçirmədiyim, amma onlar üçün vahimə yaratmış “Əsgər İbrahimovun genişlənən karyera”sı olubmuş. Sən demə, fəaliyyətində ancaq agentliyin nüfuzu üçün çalışan Əsgər İbrahimov çox qorxulu imiş. Nə qədər primitiv düşüncə…
Əlbəttə, bu sözləri yazmaqla özümü önə çəkmək fikrim yoxdur, sadəcə, bu, bir həqiqətdir və bunları o dövrdə istər Prezident Adminstrasiyasında, istərsə də AZƏRTAC-da işlədiyimiz insanlar təsdiqləyə bilərlər.
Bəli, Azərbaycanın ilk milli xəbər agentliyi olan AZƏRTAC 104 illik fəaliyyətlə bağlı xəbər yayıb. Oxudum, özü də bir neçə dəfə oxudum və özüm üçün aydınlaşdırmaq istədiyim bir neçə məqamı bölüşmək, diqqətə çatdırmaq istədim. Yəqinki inciməzlər, səhv etsəm üzürlü sayarlar.
Faktdır ki, AZƏRTAC-ın 104 illi tarixində 17-18 il agentlikdə fəaliyyət göstərən, canını VƏTƏN yolunda qurban verən, ölkə rəhbəri tərəfindən “3-cü dərəcəli “Vətənə xidmətə görə” ordeni ilə təltif edilən Məhərrəm İbrahimov adlı şəhidi var. Bir əsrdən çox yaşı olan etibarlı agentliyin yeganə şəhidinin bu gün nəinki 104 illiklə bağlı xəbərində, heç binasında dəyərli bir xatirə lövhəsi yoxdur. Ancaq 3-5 şəkil yapışdırıb sonuncu mərtəbələrin birinə vurmaqla kifayətlənmək doğrudurmu? Yazılan xəbərdə bununla bağlı bir cümlənin olması görəsən AZƏRTAC adına xələlmi gətirəcəkdi?
İnanın ki, bunları yazmaqda məqsədim nədənsə gileylənmək, kiməsə qarşı nifrət bəsləmək, yaxud kimdənsə nəsə ummaq deyil. Sadəcə mətbuatda AZƏRTAC-ın 104 illiyi ilə bağlı xəbəri oxuyub kövrələrək yazmaq istədiyim duyğulardır. Çünki bu tarixdə az da olsa bizim də əməyimiz var…
Yenə də optimist olaraq AZƏRTAC-ın hər zaman daxilində mövcud olan sağlam kollektivini təbrik edirəm. Müasir düşüncəli yeni sağlam rəhbərliyin səmərəli fəaliyyətini, formalaşdırmağa çalışdığı sağlam mühiti təqdir etməklə yanaşı, duyğulandığım məsələlərlə bağlı düşünəcəyinə əminəm.
Bir daha AZƏRTAC-ı 104 yaşı münasibətilə təbrik edirəm!
Hər zaman səsiniz uca gəlsin!
Əsgər İbrahimov – jurnalist
